Atualità
La Ministra Giannini a Balsan: „Le plurilinguism é n punt de forza“
Presentè le proiet dl Govern „La Buona Scuola – Facciamo crescere il Paese“ y ascutè sö les propostes y i impulsc di rapresentanć dl monn dla scora dla Talia: chisc é i dui obietifs prinzipai dl tour dla Ministra por l’istruziun Stefania Giannini che à metü man incö (09/10) cun na vijita a Balsan.
„I ùn debojëgn de na buna scora“, insciö à la ministra por l’istruziun Stefania Giannini metü man so discurs incö, jöbia ai 9 d'otober, danmisdé tl aula magna dl lizeum Pascoli a Balsan: „L’istruziun é la sora soluziun a dorada lungia cuntra la dejocupaziun y la sora resposta ala domanda do competënzes nöies che s’à formè tres cambiamënć economics y soziai.“ Por realisé chësc proiet él nezesciar, do la minunga dl Govern, dla colaboraziun de dötes les perts che alda pro le sistem scolastich nazional, dai studënć, ai, geniturs, ai maestri, professurs y direturs.
La Ministra Giannini à incuntè incö a Balsan i rapresentanć dla realté scolastica dl Südtirol, al’incuntada cun la ministra al tut pert danter l'ater i trëi Intendënć dles scores di trëi grups linguistics, Roland Verra, Nicoletta Minnei y Peter Höllrigl. Les incuntades danter la ministra y i rapresentanć dles scores é öna dles mosöres por scomenćè le dialogh cun les perts interessades sön döt le teritore dal Talia.
I trëi Intendënć dla scora südtiroleja ti á insciö presentè ala Ministra Stfeania Giannini i aspeć plü importanć y i punć de forza dla scora dl Südtirol tignin cunt dles desfarënzies di trëi aparać scolastics che se caraterisëia da n impëgn costant por raforzè le plurilinguism y dal’ospitalité dl sistem che inserësc n numer tres plü alt de scolars de provegnënza foresta (o cun geniturs che de provegnënza foresta), da n contat costant cun le monn dl laûr che favorësc l’inserimënt sozial di jogn tl monn dl laûr y caraterisé, por ći che reverda les scores profescionales todësces dl sistem dual, da n raport costant danter teoria y pratica.
L’Intendënt por la scora ladina Roland Verra à sotligné l’importanza dl sistem scolastich tles valades ladines che é bun da garantì le svilup dla vita culturala dl grup de mendranza ladin che fej fora zirca le cinch procënt dla popolaziun dl Südtirol.
Por le momënt él zirca 40 porcënt di jogn (9.500) cun lingaz dla uma todësch che é scrić ite a scores profescionales, 13.000 studënć é scrić ite a scores altes todësces. La scora südtiroleja é, do la descriziun fata dai trëi Intendënć scolastics, na scora en vita, plëna de impulsc, daverta por les sfidades che vëgn dal monn dl laûr, capaza dl’autonomia y di obietifs che ara é stada buna da arjunje ti ultimi dezenns.
L’ombolt da Balsan, Luigi Spagnolli, à sotligné te so discurs che la Provinzia de Balsan po gnì conscidrada sciöche na „palestra dla convivënza“, mo che la convivënza ne é nia n conzet costant y invariabl, y che „ara mëss gnì concuistada dé por dé, deache les arjuntes de chësc valur fondamental ne po nia gnì conscidrades sciöche n valur acuisté definitivamënter.“
Do les parores de presentaziun à la ministra Giannini presentè i obietifs dl proiet „La Buona Scuola“ che prevëiga plü incuntades te döta la Talia. Le Govern valutëia chësc proiet sciöche fondamental inće por ći che reverda le superamënt dla crisa economica dla Talia. La ministra à ajuntè che le Govern à l’intenziun da investì n miliard de euro por l’istruziun y por la revalutaziun dl rode dl insegnant che dess deventè un di pilastri prinzipai dl sistem formatif talian.
Öna dles mosöres che le Govern prevëiga é le potenziamënt dl proiet scora-laûr cun l’integraziun tl prozès dles aziëndes de grandëza pićera y mesana, 300 miliuns é insciö gnüs aprovà por n „orientamënt nü di laborators tecnincs“ y por n aumënt dles ores de practicum tles aziëndes. „Les competënzes che i jogn impara tles scores mëss ti pormët l’inserimënt tl monn dl laûr“, à comentè Giannini.
La ministra por l’istruziun Giannini à inće laldè le potenziamënt dl plurilinguism che le sistem scolastich südtirolej à portè inant, „n punt de forza fondamental a livel europeich por favorìsé l’inserimënt di jogn sön le marćé dl laûr“.
Do le discurs dla ministra él stè i rapresentanć dla Consulta di studënć (Jacopo De Zulian, Julian Nikolaus Rensi y Sara Frenademetz), i presidënć dles trëi consultes di geniturs (Giuliana Boischeri, Kurt Rosanelli y Ivana Peristi), Sandro Fraternali en rapresentanza di sindacać y plü insegnanć, direturs scolastics y studënć che à dit la süa.
Plü informaziuns sön le proiet "La Buona Scuola" pon ciafè sön:www.labuonascuola.gov.it.
rc
Galaria dales fotografies
Foto: USP - Othmar Seehauser
Foto: USP - Othmar Seehauser
Da sin.: Roland verra, il ministro Stefania Giannini, Nicoletta Minnei e Peter Höllrigl Foto: USP - Othmar Seehauser
