Atualità
Finanzes y autonomia, Kompatscher a Roma: Vari inant tl vers de n’acordanza
N vare inant é gnü fat incö (ai 9 d’otober) dal Presidënt Kompatscher tratan l’incuntada cun le Secretêr de Stat Delrio a Roma por ći che reverda les tratatives danter le Stat y la Provinzia por modaziuns al finanziamënt dl’autonomia. „I sun tres plü daimprò a n’acordanza, mo les convenziuns verbales messarà ćiamò gnides metüdes por scrit por s'incuntè proscima edema“, à comentè Kompatscher.
L’obietif dles tratatives danter Roma y Balsan é na rediscusciun dles acordanzes por ći che reverda le finanziamënt dl’autonomia. Sciöche bele detlarè da Kompatscher tl scomenćiamënt dl’edema é l’obietif dla Provinzia chël da ciafè n’acordanza che prevëighes na garanzia de planificaziun de dorada lungia, na basa iuridica sterscia y n contribut mënder de finanziamënt dla Provinzia por le ressanamënt dl bilanz dl Stat.
Öna dles fondamëntes por arjunje na soluziun é naturalmënter le mëteman de n dialogh danter le Govern y la Provinzia por mëte adöm n test che vëgnes conscidré da trames les perts positif. „Tratan l’incuntada da incö a Palaz Chigi sunse stà bugn da ciafè val’acordanza sön valgügn punć, sön d’atri punć él ćiamò da stlarì valgönes domandes“, à comenté Kompatscher. Les acordanzes ciafades incö é gnüdes menades inant a na grupa de esperć che laorarà fora n test d’acordanza che sarà spo al zënter dla proscima incuntada danter le Stat y la Provinzia che é preodüda por proscima edema.
„Te vigni caje se tolarunse döt le tëmp nezesciar por ejaminé düć i detais dles propostes. I ùn bele fat valgügn vari importanć, mo l’acordanza che orun ciafè é massa importanta por nia ne gnì valutada a funz, deache al se trata de inserì modaziuns al Statut por ći che reverda le finaziamënt dl’autonomia“, à stlüt jö Kompatscher.
rc
