Atualità
Ferata tla Galizia: 400 studënć sön le iade tl’Europa dl ost
Ai 16 d’otober piarà ia la ferata por la Galizia, n iade por jì a descurì y capì i avenimënć che ê sozedüs dan da apresciapüch 100 agn tratan la perioda dla Pröma vera mondiala. I studënć che tolarà pert al iade sarà söporjö 400 dales trëi provinzies dl’Euregio. Inier (09/10) s’à incuntè la grupa di studënć südtirolej a Porsenù por n'incuntada de preparaziun.
„Por cinch dis sarà chisc studënć sön le iade amesa valgügn di posć al zënter dla perioda dla Pröma vera mondiala danter i agn 1914 y 1918. L’obietif dla scomenciadia é inće chël da capì y da recordè i fai tragichs che é gnüs fać tl passè dales porsones“, à comentè le Presidënt dla Provinzia Arno Kompatscher. La scomenciadia dla ferata dles recordanzes é gnüda organisada y vëgn sostignida dal’Euregio Tirol-Südtirol-Trentin en gaujiun dl centenar dl scomenćiamënt dla Pröma vera mondiala, le secretêr general Matthias Fink à sotligné tratan la pröma incuntada di partezipanć dl Südtirol che „les aspetatives danter i jogn é granes“. 150 sarà indöt i studënć dl Südtirol che tolarà pert ala scomenciadia, 400 é le numer complessif di studënć dles trëi regiuns dl’Euregio y che é partis sö danter la cuarta y la cuinta tlassa dles scores altes. I studënć vëgn acompagnà da insegnanć, storics y esperć.
Les scores che é gnüdes chirides fora por to pert al iade é: la scora alta dl ITE da La Ila, les scores profescionales de lingaz todësch de Maran („Marie Curie“) y de Auer, la scora alta de lingaz talian „Ghandi“ da Maran y l’Istitut Tecnich de lingaz talian „Cesare Battisti“ da Balsan.
Le iade prevëiga plü tapes, danter l’ater: na vijita dla cité de Krakòw, dl Ćiastel de Wawel, dla cité fortificada de Przemysl y dles cortines de soldà tomà tla Pröma vera mondiala Brzesko y Brylince. I storics Pablo Giacomel y Gertrud Margesin ti à recordè ai studënć tratan l’incuntada che é gnüda tignida inier tla Academia Cusanus a Porsenú che plü milesc soldas de provegnënza dal Tirol, Südtirol y Trentin à pordü la vita avisa te chëres zones. Le start dla "Ferata tla Galizia" é preodü
en jöbia, ai 16 d’otober
dales 16.45
ala staziun dla ferata dl Prener
en presënza di Presidënć Arno Kompatscher (Presidënt dla Provinzia) y de Günther Platter (Presidënt dl Land Tirol) che saludarà i studënć, insegnanć, storics y esperć che fajarà le iade tla Galizia.
Le program dl iade „Ferata tla Galizia – 100 agn pröma vera mondiala“ po gnì desćiariè tres la plata internet: www.euroregione.info/galizia.
rc
Galaria dales fotografies
Foto USP
