Atualità
Register de tlassa digital, Deeg: „Chësc é n proiet da sostignì“
N register de tlassa completamënter digital: l’informatich Stefan Raffeiner à presentè inier (ai 9 d’otober) al’assessuria por l’informatica Waltraud Deeg chësta idea. Por Deeg é chësc n“proiet da sostignì y da valuté por ći che reverda l’aplicabilité tecnica y informatica“.
L’introduziun de n register de tlassa digital, che favorësces le smendrimënt dl consum de papier, l’azeleraziun y la scemplificaziun di raporć danter la scora, i insegnanć, i geniturs y i maestri, é por la Junta provinziala öna dles tematiches da afrontè proscimamënter. La Junta à bele debatü sön chësta tematica tratan na sentada ai 16 de setëmber olache al é inće gnü stabilì n plann por le scomenćiamënt dl proiet. Le pröm vare é l’istalaziun por le proscimo ann scolastich 2015/2016 de na software unitara tres le sostëgn dla Repartiziun Informatica. Le concurs por la realisaziun dess gnì scrit fora de dezëmber.
Inier (09/10) à l’informatich Stefan Raffeiner presentè so proiet al’assessuria por l’informatica Waltraud Deeg, n proiet che le jonn de 22 agn à metü adöm cun trëi insegnanć dl lizeum tlassich da Maran. Le register de tlassa digital é gnü svilupé da Raffeiner tl 2012 y vëgn anuzè atualmënter da 15 scores tl Südtirol. „Proieć sciöche n register de tlassa digital é da sostignì, deache ai porta pro a soluziuns tecniches y informatiches asveltes, che dess inće ester compatibles por n sistem ampl sciöche chël dla scora. La Provinzia laôra por stimolé idees nöies y inovatives te chësc setur, dandadöt idees che vëgn dai jogn cun resultać che an po osservè bele n pert sön la plataforma dl’Agenda digitala 2020 aad2020.provincia.bz.it“
rc
