Atualità
Preparaziun PISA 2015: La scora ladina s'incunta ai 20 d'otober
91 scores te döt Südtirol cun indöt 2139 scolars (1036 mitans y 1103 mituns) à fat para tl 2012 al’inrescida PISA-OCSE. Por la scora paritetica dles valades ladines él preodü n’incuntada de presentaziun di dać dl 2012 y de formaziun por le stüde dl 2015 ai 20 d’otober dales 15 tl Istitut Tecnich Economich a Urtijëi cun l’espert Roberto Ricci.
L’inrescida PISA-OCSE ejaminëia te n interval regolar de trëi agn les competënzes di scolares y scolars che à complì dai 15 agn y trëi mëisc ćina ai 16 agn y dui mëisc (tl 2015 düć chi che é nasciüs tl ann 1999) ti ćiamps dles sciënzes naturales, dla matematica, dl savëi da lì y dal 2012 inant inće tl ćiamp dl „problem solving – financial literacy“. L’obietif dl’inrescida é na comparaziun internazionala di ćiamps de savëi y d’educaziun di scolars y dles scolares dl’eté ejaminada. Por i insegnanć y por i direturs dantaldöt dles scores altes, mo inće dles atres scores y por les persones interessades ala scora paritetica ladina vëgnel pité n domisdé de presentaziun di resultać 2012 y de formaziun por le 2015
ai 20 de otober,
dales 15
tl Istitut Tecnich Economich
a Urtijëi
cun l’espert prof. Dr. Roberto Ricci, Diretur dles proes INVALSI che jarà ite plü sot sön les particolaritês de PISA 2012 y 2015 n general y sön i resultać dles scores de Gherdëna y dla Val Badia. Implü gnaràl presentè plü avisa n valgügn items cun ejëmpli per se arjigné ca ales proes PISA 2015 y por informè y istruì i presënć sön les prozedöres nöies. Les proes PISA dl 2015 gnarà fates por le pröm iade sön le computer, la priorité sarà chësc iade sön les competënzes scientifiches di studënć. Düć é bel invià a to pert.
rc
