Atualità
Ampliamënt dl’oferta de programs radio digitai da en mercui te döt Südtirol
Da en mercui, ai 15 d’otober inant saràl poscibl da rezepì tres la trasmisciun digitala indöt 33 programs radio dla RAS, dla Rai y de emitënć radio privać. L’ampliamënt di programs y dla rezeziun é gnü inauguré ofizialmënter incö (13/10) dal Presidënt Arno Kompatscher cun l’ativaziun dl implant de trasmisciun nü por le radio digital tla sënta dla RAS a Balsan.
Le Presidënt dla Junta Arno Kompatscher à recordè incö, lönesc ai 13 d'otober le prozès d’evoluziun tl ćiamp di media dala fondaziun dla RAS (Radiotelevijiun Aziënda por le Südtirol) ti ultimi 40 agn ćina aldedaincö. „La RAS à surantut ti ultimi agn tres plü competënzes, insciö ne éra nia ma plü responsabla por mëte en ona programs da foradecà, mo ara colaborëia inće tres deplü cun le setur privat“, à comentè Kompatscher che à ajuntè che cun chësta colaboraziun él meso da garantì na pluralité tres plü ampla d’odüdes y de programs mediai.
L’ativaziun dl implant de trasmisciun digital é n vare important, deache al contribuësc a na mioraziun dla cualité y n ampliamënt dla rezeziun tl Südtirol. „Implü é la tecnica nöia inće n meso de comunicaziun important ti caji d’emergënza, deache tres la trasmisciun digitala podunse menè inant tl tëmp real notizies sön la proteziun zivila y avisc sön autisć che va cuntraman“, à splighé le Presidënt dla Junta.
Le Presidënt y le Diretur dla RAS Rudi Gamper y Georg Plattner à cumpedé sö incö i trëi vantaji dl’ativaziun dl zënter de trasmisciun nü. Le pröm vantaje é n’aumënt dl’oferta di programs. Tres la trasmisciun digitala él gnü slariè fora la copertöra dla rezeziun sön döt le Südtirol inće por 13 programs radio privać dl consorz DAB Media (13 programs che röia laprò ai 16 programs dla RAS y i cater dla Rai), danter chisc inće Radio Gherdëina. La secunda novité é che cun le zënter de trasmetënza nü saràl poscibl da rezepì zënza desturbs i programs radio digitai inće te raiuns dl Südtirol olache na rezeziun ne ê ćina śëgn nia o ma en pert poscibla y cun desturbs tla rezeziun (por ejëmpl tla pert alta tl raiun dla Val de Puster y tl Vinschgau).
Le terzo vantaje reverda n aumënt de cualité. Tres l’ativaziun dl zënter de trascmisciun nü passa na seria de programs dal livel de cualité DAB a le livel plü alt DAB+ (DAB plus), por ejëmpl podaran ascutè le program ladin dla radio „Radio Rumatsch“, le canal por mituns Kiraka y Bayern 1 da en mercui inant tla cualité DAB+. L’adatamënt al standard de cualité DAB+ é na mosöra stabilida dal Minister, la RAS à preodü na perioda de converjiun ćina le 2017.
Por ativè l’oferta digitala él debojëgn da programè la radio digitala danü da en mercui inant. Chësc po gnì fat tres na chirida automatica nöia di programs. Düć i possessurs de n rezetur DAB+ podarà insciö rezezì do la chirida düć i programs esistënć y nüs che vëgn trasmetüs te che zona, possessurs de n radio DAB arà la poscibilité da ascutè i 10 programs atuai DAB.
Plü informaziuns sön l’ampliamënt pon ciafè sön la plata internet dla RAS, (http://www.ras.bz.it/)
rc
