Atualità
Agricoltöra: La Junta à aprové compensaziuns por i danns dl ri tëmp
Les conseguënzes dl ri tëmp da plöia tratan l’isté é gnüdes tratades incö (14/10) dala Junta provinziala tla sentada edemala. „Cun la cuantité de plöia che é gnüda jö chësc istè ne él nia stè poscibl te n gröm de caji da sié i prà da munt y da mët a sëcié le fëgn, insciö unse tut la dezijiun da compensè i paurs por i danns“, à dit le Presidënt Kompatscher. La compensaziun é de 150 euro por hectar
Le ri tëmp cun tröpa plöia à portè chësc ann a na seria de danns por l’agricoltöra dandadöt por ći che reverda les racoiüdes sön i prà da munt. La Junta provinziala à insciö tut la dezijiun da compensè i danns y les manćianzes de racoiüda ti raiuns alpins. „Les retüdes di danns gnarà paiades fora por düć i prà da munt sura 1500 metri, implü inće por prà da munt cun n’inclinaziun dër ërta che é da ciafè a n altëza danter 1000 ćina 1500 metri sura le livel dl mer“, à splighé incö le Presidënt dla Provinzia Arno Kompatscher. Cun la denominaziun „dër ërt“ vëgnel definì prà che à n valur mesan d’intlinaziun de almanco 40 porcënt.
Chësta mosöra é ponsada dandadöt sciöche compensaziun por i cosć ajuntifs che i paurs à albü chësc istè, sciöche por ejëmpl cun la cumpra ajuntiva y nezesciara de ojoradöra a gaujia dla manćianza de racoiüdes. N critêr fondamental é implü por la conzesciun dl sostëgn finanziar le zidlamënt efetif de tiers: „Cun chësta mosöra vëgnel ma sostignì chi che zidlëia tiers sön so lüch“, à dit Kompatscher. Le sostëgn finanziar é preodü sciöche n contribut de 150 euro por n hectar de prè che adëmplesc i criters scrić dant. Le contribut mënder che vëgn paiè fora é de 300 euro, le contribut plü alt de 1500 euro.
Les compensaziuns por gaujes dl ri tëmp vëgn finanziades tres na redestribuziun di mesi finanziars preodüs sciöche sostëgn por la coltivaziun de ordöra. „Por podëi paiè fora les compensaziuns por i danns unse stabilì incö da sburlé zoruch por le momënt i contribuć por implanć da sprinzé ega por les spërses de coltivaziun de ordöra ai consorz interessà“, insciö le Presidënt dla Provinzia. Insciö ne gnaral te chësc setur nia plü paiè fora contribuć ćina la fin dl 2017. „Por dötes les domandes che é bele rovades ti Ofizi competënć gnaral naturalmënter fat n’ezeziun“, insciö Kompatscher.
rc
