Atualità
La Junta provinziala à stabilì i critêrs y le program por le Bausparen
Cun le scomenćiamënt dl 2015 sarál poscibl da fà domanda por n imprëst por la costruziun, cumpra o recuperada dla ćiasa de proprieté tres la soma sparagnada y metüda da pert te n fonds de ponsiun: La Junta provinziala à aprovè insciö incö (14/10) i critêrs de adejiun y i proscimi vari por l’atuaziun dl model Bausparen.
Le model tlassich dl Bausparen che vëgn adorè ti Paîsc dla Germania y dl’Austria prevëiga alisiraziuns fiscales sciöche mosöra de stimolaziun por portè i zitadins a sparagné por investì tla costruziun de ćiases de proprieté. N model che ne é nia poscibl tl Südtirol, sciöche le Presidënt dla Provinzia Arno Kompatscher à splighé incö, mertesc ai 14 d’otober: „L’atuaziun de n model cun chëstes carateristiches ne é por nos nia poscibl deache i ne ùn nia les competënzes primares te chësc setur.“ La Junta provinziala à aprovè insciö n model alternativ y inovativ che coliëia i sparagns por la ćiasa cun la previdënza por l'anzianité. „Cun le model aprovè incö orunse ti garantì a chi che sparagna tres n fonds dla ponsiun da avëi n azès alisirè a domandes d’imprëst por la cumpra, la costruziun o la recuperada dla pröma ćiasa“, à splighé incö Kompatscher.
Le program plurianual gnarà finanzié tres le fonds de rotaziun dla Provinzia y gnarà conzedü zënza to en conscidraziun le davagn o le patrimone dl singul proponët. I critêrs por presentè na domanda sarà la residënza de almanco cinch agn tl Südtirol y l’iscriziun a un di fonds de ponsiun che fajarà pert dl model dl Bausparen (sparagn por la ćiasa). I fonds de ponsiun che fajarà pert dl model gnarà comunicà cun gran probabilité da mez novëmber inant. „Un di critêrs por fà domanda sarà l’iscriziun a n fonds de ponsiun por almanco ot agn y che la soma dla posiziun personala de contribut tl fonds messará ester de almanco 15.000 euro“, à dit Kompatscher che à ajunté che insciö dessel gnì zertifiché le possès efetif di mesi finanziars por le fianziamënt dla cumpra o dla costruziun de na ćiasa de proprieté privata.
La pröma tapa por düć i interessà al imprëst sarà insciö la presentaziun dla domanda do na conzesciun de n imprëst pro na banca che sostëgn le model Bausparen. La banca sarà inće inćiariada da controlè l’ademplimënt di critêrs di proponënć, da valuté le plann de finanziamënt y da stlü jö le contrat sön l’imprëst a inom y por cunt dla Provinzia. Na convenziun cun les banches dess gnì ciafada por la secunda pert dl mëis de Novëmber. Le fit dl imprëst gnarà stabilì tres n’acordanza danter la Provinia y les banches, la soma dl imprëst variëia en basa ala posiziun singula dl proponënt y reverda la soma efetiva tl fonds dla ponsiun. La soma complessiva dl imprëst ne podarà nia ester plü alta co le dopl dl valur dla posiziun singula y ne podarà nia jì sura i 200mile euro fora.
„Cun chësta regolamentaziun sarà la soma imprestada dala Provinzia en relaziun ala soma sparagnada dal singul“, à splighé Kompatscher. Sciöche garanzia sön l’imprëst gnaràl registré n’ipoteca a vantaje dla Provinzia sön la pröma ćiasa. Le paiamënt gnarà partì sö te rates semestrales o anuales, y al podarà gnì de zoruch döt l’import dl imprëst tres na restituziun antizipada. La Junta provinziala à insciö aprovè incö le model dl Bausparen, n impuls efetif por alisiré n finanziamënt plü sigü a dorada lungia. Por le scomenćiamënt de dezëmber gnaràl stabilì les acordanzes cun les banches y i fonds ponsiun, daldô metarà man la formaziun di colaboradus di istituć interessà. „Daldô saral poscibl da dè jö les prömes domandes, plüssigü cun le scomenćiamënt dl ann nü 2015“, à stlüt jö Kompatscher.
rc
