Atualità
Dala Junta:Pesć scientifics, compensaziuns, Inovaziun aministrativa
La Juntà à conzedü incö (14 d’otober) le pest por l’archirida y le pest por la sciënza dl Südtirol por le 2014. Le Pest por la sciënza é jü a Markus Ralser, le Pest por l’archirida a Evelyn Kustatscher. La Junta à implü aprovè 2,75 miliuns de euro sciöche compensaziuns ambientales, l’istalaziun de n raiun de sconanza incër le mür dla cité de Glurns y le conzet „Inovaziun dl’Aministraziun 2018".
La Junta provinziala surandà da dui agn incà anualmënter dui pesć por promöie l’archirida di scienzià locai dl Südtirol: le Pest por l’archirida scientifica y le Pest por la sciënza dl Südtirol. Le Pest por l’archirida scientifica à n valur de 30mile euro y à sciöche obietif le sostëgn dles generaziuns jones de scienzià locai sot ai 40 agn. Chësc ann é le pest gnü atribuì dala Junta a Evelyn Kustatscher che laôra sciöche conservadëssa tl ćiamp dla paleontologia tl Museum provinzial dles Sciënzes naturales. Le Pest scientifich dl Südtirol à n valur de 10mile euro: la Junta dla Provinzia premiëia cun chësc pest esperć che à contibuì cun prestaziuns ezelëntes al svilup dl’archirida scientifica te ćiamp internazional. Le reconoscimënt por le 2014 é jü al professur y bio-chimich Markus Ralser, professur y scienzià dl’Université de Cambridge. Le 70 porcënt dla dotaziun de entrami i pesć messarà gnì investì por ativitês d’ajornamënt y de perfezionamënt.
N secundo arat positif à dè la Junta incö por ći che reverda le program trienal de finanziamënt de mosöres ambientales por na soma de 2,75 miliuns de euro sciöche compensaziun por la produziun de eletrizité dl implant idroeletrich de Laas. Les mosöres prevëiga danter l’ater la realisaziun de chëstes mosöres ti Comuns de Laas, Latsch y Martell: le ressanamënt dla condüta dal ega, intervënć por miorè la vita di pësc, n parëi da d’arpize sön i mürs dla diga dl lêch artifizial, mioraziuns al’implant d’ilominaziun publich, ressanamënć dl post de reziclaje y l’elaboraziun de conzeć de mobilité sostenibla.
Implü à la Junta stabilì incö l’istalaziun de n raiun de sconanza de 100 metri incër le mür de fortificaziun dla cité de Glurns, n monumënt storich dla perioda dl tëmp medieval. Dötes le parzeles da frabiché y de terać tl raiun de 100 metri dal mür dla citè gnarà metüdes sot a sconanza: „Chël ô dì che al ne podarà nia gnì fat sö costruziuns nöies te chësta spersa, gnanca costruziuns de sostëgn por l’agricoltöra: degügn pilastri de petun por la coltivaziun de pom o chersces, degügn implanć d’inagaziun fisc, rëis o folies artifiziales“, à splighé Kompatscher. La dezijiun ne prevëiga insciö nia la proibiziun dla coltivaziun de plantes da früć, sciöche le Comun de Glurns ess stabilì tres l’inserimënt dl raiun de sconanza tl plann urbanistich, mo le raiun de sconanza é gnü aprovè tres la sconanza di bëgns culturai: „Insciö unse ciafè na soluziun de balanza danter dötes le perts interessades y che mët en evidënza la sconanza dl aspet de döta la cité cun al zënter la proteziun dla fortificaziun storica medievala“, à stlüt jö Kompatscher.
Inultima à la Junta provinziala de jö so arat positif sön le proiet de amodernamënt dl’Aministraziun publica tres le conzet „Inovaziun dl’Aministraziun 2018“. La reforma dl’aministraziun publica dess integrè tl prozès de reorganisaziun dötes les perts dl’aministraziun, dandadöt inće i suranstanć y direturs dl’aministraziun provinziala. L’assessuria por l’aministraziun Waltraud Deeg darà insciö ofizialmënter indoman, mercui dales 14.30 le segnal de start al proiet „Inovaziun dl’Aministraziun 2018“ cun la secunda conferënza danter i direturs dl’Aministraziun provinziala tla sënta dl Eurac, alea Drusus 1, a Balsan.
rc
