Atualità
Les tratatives finanziares cun le Govern é stlütes jö: "Pat de garanzia"
Cun n „pat de garanzia“ à le Presidënt dla Provinzia stlüt jö incö (15/10) a Roma les tratatives danter le Govern y la Provinzia por le finanziamënt dl’autonomia tl dagnì.„I ùn stabilì na soma fissa sciöche contribut de partezipaziun al ressanamënt dl bilanz statal por impedì insciö al Stat da se tignì suraprò ressurses finanziares suplementares che ti speta ala Provinzia“, à sotligné Kompatscher.
Segurëza iuridica y segurëza tla programaziun é stà i dui obietifs primars dl Presidënt dla Provinzia Kompatscher por la tratativa cun le Govern por ći che reverda la redefiniziun dl finanziamënt dl’autonomia dl Südtirol. Trami dui i obietifs é gnüs arjunć incö (ai 15 d’otober) a Roma dal Presidënt dla Provinzia Arno Kompatscher adöm cun i rapresentanć dl govern Pier Carlo Padoan, Graziano Delrio, Gianclaudio Bressa y Maria Carmela Lanzetta tres l’acordanza sön le "pat de garanzia" danter le Stat y la Provinzia. Al vëgn confermè inscö le prinzip che 9 perts de 10 dles entrades tributaries che vëgn prodütes te Südtirol ti speta ala Provinzia „mo i ùn ot sotissura les modalitês de paiamënt: insciö ne saral nia plü le Stat trasferësc nosta pert, mo la Provinzia che ti mëna inant la diejima pert che ti speta al Stat o che ademplësc al paiamënt sot ala forma de na surantuta de competënzes nöies.“ Cun chësta formula se mët la Provinzia al sigü por ći che reverda retignüdes unilaterales da pert dl Stat y garantësc na proteziun iuridida cuntra intervënć suplementars dl Govern por le ressanamënt dl bilanz statal.
Le Presidënt Kompatscher à definì l’acordanza n „pat de garanzia, deache le contribut dla Provinzia é gnü stabilì te na manira fissa y sarà na porcentuala fissa sön i fić sön le debit publich, de chi che Südtirol messarà paiè le 0,6 porcënt. Por chësc ann reverda la spëisa da paiè indöt 476 miliuns de euro, na soma cotan plü basa di 800 miliuns che le Stat s’à tignì por le momënt“. Ćina al 2018 messarà la Provinzia calcolè n import da ti dè jö al Stat de 800 miliuns de euro: „Chësc por gaujia dles calcolaziuns dl Stat sön le bilanz de previjiun, le import romagnënt dai 476 sön i 800 miliuns nes gnarà daldô paiè zoruch dal Stat“, insciö Kompatscher.
Le pat de garanzia prevëiga danter l’ater inće assiguraziuns che le Stat ne podarà nia s’anuzè de mosöres suplementares por se sorvì de atres ressures finanzieres che ti speta ala Provinzia, "sciöche al é gnü fat ti ultimi agn cun cutes speziales olache le profit ti restâ daldöt al Stat", à dit Kompatscher. L’acordanza danter Balsan y Roma gnarà inće confermada a livel internazional tres na corespondënza danter la Talia y l’Austria. „Cun chësc passaje vëgn l’acordanza metüda sön n livel de dërt internazional y porta pro a n aumënt dl pëis iuridich dl’acordanza“, à stlüt jö Kompatscher. I resultać dla tratativa danter la Provinzia y le Govern gnarà presentà ti proscimi dis al Consëi y ala Junta provinziala.
rc
