Atualità

Aministraziun | 15.10.2014 | 17:48

Le proiet „Inovaziun aministrativa 2018“ é pié ia: Provinzia plü moderna

Na Provinzia plü moderna y buna da adorè les ressures te na manira efiziënta: chisc é i obietifs dl prozès de reorganisaziun dl’Aministraziun publica dla Provinzia. Le segnal de start dl proiet „Inovaziun aministrativa 2018“ é gnü dè incö, mercui ai 15 d’otober dal’assessuria por l’aministraziun Waltraud Deeg y dal diretur general Staffler. Trëi agn s’à la Provinzia dè tëmp por realisé le proiet.

Le model d’organisaziun che vëgn adorè aldedaincö dal’Aministraziun provinziala é gnü svilupé tl 1992, dan da 20 agn. „Al à funzioné ćina śëgn te na manira otimala, mo al é gnü le tëmp da fà na modernisaziun: insciö ne s’à nia ma mudé les competënzes dla Provinzia che aldedaincö à en gestiun tres plü sorvisc, mo desfarëntes é inće deventades tl tëmp les esigënzes di zitadins, dandadöt por ći che reverda la cualité y la produtivité“, à sotligné incö, mercui ai 15 d’otober, l’assessuria Waltraud Deeg tratan la Conferënza di suranstanć provinziai che é gnüda tignida al Eurac de Balsan. En presënza de na buna pert di direturs di Ofizi, dles Repartiziuns y di Departimënć dla Provinzia à l’assessuria Deeg portè dant sües propostes y à dit che al „va debojëgn da orientè danü döta la strotöra dl’aministraziun publica cun le fin da garantì prozesc plü moderns y n’adoranza dles ressurses plü efiziënta.“ 

Les sfidades a chëres che an messarà ti dè na resposta tacarà tl dagnì adöm danter l’ater cun i cambiamënć demografics, le peioramënt dles condiziuns economiches, le smendrimënt di mesi finanziars a desposiziun y la presciun tres plü alta sön le marćé dl laûr. „Chësc impuls chi i inaugurun incö dess gnì odü da nüsc suranstanć sciöche n oportunité de cambiamënt y nia sciöche n pericul. La colaboraziun de düć é te chësc vers fondamentala“, à sotligné Deeg.

Inće le Presidënt dla Junta Arno Kompatscher, che ne à nia podü to pert ala conferënza, à sotligné te n video-messaje i obietifs y l’impëgn dla Junta provinziala por le renovamënt dl’aministraziun: „I orun ti deleghè na maiù responsabilité ai zitadins y portè insciö a n aumënt dla partezipaziun. Chësc ô inće dì che ùn debojëgn de na gran motivaziun da pert di aministradus publics y de na maiù flessibilté finanziara y tl’organisaziun: l’inovaziun te chësc vers mëss pié ia dales strotöres internes dla Provinzia“, à dit Kompatscher che à injuntè che al ti gnarà dè a düć la poscibilité da contribuì a chësc percurs de renovamënt.  

La direziun aministrativa dl proiet é tles mans dl Diretur general Hanspeter Staffler, che à presentè le proiet a düć i direturs dla provinzia presënć al Eurac. Por ći che reverda la direziun politica é le proiet „Inovaziun aministrativa 2018“ tles mans de n comitê che vëgn coordiné dal’assessuria Deeg y de chël che le Presidënt Kompatscher y i assessurs Tommasini, Stocker y Schuler fej pert. Caroline Cerar se fistidiarà dla metoda dl proiet (nia di contignüs) y daldô gnaràl inće colaborè cun n grup d’esperć dl Eurac, cun le Departimënt Familia y Aministraziun y cun l’Ofize Organisaziun aministrativa dla Provinzia. Dötes les informaziuns sön le proiet pon ciafè sön la plata internet: http://inovaziun-aministrativa.provinzia.bz.it/la/default.asp

rc

Galaria dales fotografies