Atualità
Assessuria Stocker: “La reforma dla sanité va debojëgn”
L’assessuria Martha Stocker à presentè incö danmisdé (ai 16 d’otober) te na conferënza stampa tl Palaz Widmann a Balsan le ressumé dles incuntades dles ultimes edemes cun i colaboradus y rapresentanć di raiuns sanitars te düć set i ospedai dl Südtirol y cun les perts soziales y les organisaziuns di paziënć por ći che reverda i „Orientamënć nüs dl’assistënza sanitara tl Südtirol".
L’assessuria por la sanité Martha Stocker á vijité tles ultimes edemes düć i set ospedai dla Provinzia da Balsan, Porsenù, Sterzing, Bornech, Sanćiana, Maran y Schlanders por ti presentè ai colaboradus les diretives por n’orientamënt nü dl’assistënza sanitara 2020. Implü él gnü tignì incuntades cun les perts soziales y cun i rapresentanć dles organisaziuns di paziënć. Chësc contat diret é stè d’ütl por podëi aldì les minunghes dla jënt sön le post sön la chestiun dla reforma y por integrè eventualmënter les propostes fates tla planificaziun dl conzet. „I ùn ciafè n consens sön le fat che na reforma va debojëgn, mo por ći che reverda i aspeć singuls dla realisaziun él les minunghes che va ćiamò dër indalater“, á dit l’assessuria Stocker.
I ćiamps d’intervënt reverda danadöt trëi seturs: le renforzamënt dl’assistënza sanitara söl post, la realisaziun de n model tres na strotöra partida sö te plü livì (Stufenmodell) por l’assistënza sanitara ti ospedai y la creaziun de na strotöra aministrativa y de n’organisaziun unitara dl’aziënda sanitara. Tres chësc model messarà dötes les strotöres sanitares ester colegades tres na rëi, che dess portè a n’otimisaziun di procesc y dles prestaziuns, a n smendrimënt di cosć, a n aumënt dl'efiziënza tres n sistem de stimolaziuns y a na produziun de entrades finanziares olache chësc é poscibl.
„Tratan les tröpes incuntades che i à fat ai podü costaté che al esist n gran consens sön le fat che messun atuè mosöres sce orùn ester bugn, inće tl dagnì, da garantì le finanziamënt dl’alta cualité de nosta sanitè publica. I à podü registré n sostëgn coletif y unitar por ći che reverda la reorganisaziun sanitara söl post, le mioramënt dles prozedöres y prestaziuns y por ći che reverda la reforma dl’aministraziun“, à detlarè l’assessuria Martha Stocker y à insciö inće confermè che ara é stada buna, te cört tëmp, da laurè fora n proiet tler por la reforma dl’assistënza sanitara dla provinzia.
„Al é tröc che à colaborè sön la definiziun de chësc proiet, dandadöt esperć dla pratica tlinica y colaboradus de düć i raiuns sanitars che à na gran esperiënza de dorada lungia te chisc seturs. Mo i ùn inće integrè tl proiet les idees y propostes che nes é rovades adalerch tres email menades da colaboradus y dai zitadins. Al ê da odëi danfora che la proposta da realisé n model che prevëiga plü livì de assistënza tlinica portass a controversies. Les minunghes é desfarëntes dandadöt por ći che reverda ći posć che pitarà tl dagnì ći prestaziuns“, à dit l’assessuria Stocker. I dejiders é desvalis sön cares che é les prioritês y sön ći cambiamënć concreć che mëss gnì realisà dan dai atri.
„La discusciun publica se é basada dandadöt sön la stlüta di reparć dl’assistënza por les nasciüdes (Geburtenabteilung) ti pići ospedai. Tles lignes de svilup dla sanité porivnziala che é gnüdes laorades fora é la stlüta di reparć por les nasciüdes mo ùn en aspet te n conzet plëgn de mosöres. I capësci che la discusciun sön chësta tematica taca adöm cun n liam emotif dër sintì dala popolaziun, mo nos ne ùn degöna poscibilité de intervënt, deache i messun se tignì a desposiziuns statales“, à splighé Stocker.
„Implü él n mi dejidêr da stlarì che la reforma ne é nia stada fata por danejè i raiuns rurai a vantaje dles citês. Le proiet prevëiga la creaziun de n network te chël che düć i ospedai à na funziun bun definida“, insciö Stocker. I pići ospedai y i ospedai de basa gnarà conscidrà sciöche n’unité y darà vignun so contribut, tres la colaboraziun danter strotöres desfarëntes y la spezialisaziun locala, che porta a n sistem sanitar plü efiziënt por la popolaziun. Al é inće preodü plü mosöres por ći che reverda l’ospedal provinzial da Balsan“, à dit l’assessuria.
En general é les diretives por n’orientamënt nü dl’assistënza sanitara dl Südtirol ponsades por smendrì l’aumënt di cosć preodüs tl ćiamp dla sanité ti proscimi agn. Inće sce al vëgn ma conscidré, por ejëmpl, le aumënt di prisc por la Provinzia de Balsan, vëgnel calcolè n aumënt di cosć ćina le 2020 de 120 miliuns de euro por la sanité. „Cun le conzet nü che i ùn presentè prevëiga la previjiun che i sarun bugn da sparagnè prësc mesa la soma dl aumënt y insciö essun inće la poscibilité da realisé sorvisc nüs che é damanà da tëmp. Sce i ne sarun nia bugn da fà chësc sforz spo é le risch gran che i ne sarun nia plü bugn da finanziè tl dagnì nosc sistem sanitar, che funzionëia bun y sön chël che i ùn dötes les rajiuns da ester braui. Y i ne oress gnanca messëi ti splighé ales generaziuns che vëgn do ca ćiudi che i ne ùn fat nia por evité chësc svilup canche i essun ćiamò albü les poscibilitês da le fà. Ma cun chëstes mosöres podarunse i garantì a nüsc mituns la medema cualité dl’assistënza sanitara“, à sotligné Stocker.
Ala fin dla conferënza stampa à l’assessuria ćiamò porté dant i proscimi vari:
Ti proscimi dis ti gnaràl dè ai direturs di raiuns sanitas l’inćiaria da organisé incuntades cun i rapresentanć di Comuns y di raiuns sanitars y da elaboré adöm valgönes propostes por sparagnè cosć y de reorgansiaziun. Pro les propostes saràl da to en conscidraziun i cosć, i standarg de segurëza y de cualité y le cheder iuridich. Les propostes messarà gnì presentades ćina ai 24 de novëmber. L’analisa y la valutaziun dles propostes gnarà presentada por la fin dl’ann.
Ai 22 d’otober sarà Martha Stocker a Roma por n’incuntada cun la ministra dla sanité Beatrice Lorenzin. Al gnarà baié di obietifs dla „spending review“, dla reduziun di posć let, dl reconoscimënt dla formaziun spezialistica di doturs sciöche inće dla stlüta di reparć por l’assistënza por les nasciüdes (Geburtenabteilung), inće por podëi stlarì sce al foss poscibl da ciafè na regolamentaziun straordinara te chësc setur por le Südtirol.
A mez novëmber presentarà Alberto Pasdera i contignüs de süa inrescida y de so model de banca dać por ći che reverda i cosć ti ospedai südtirolej. Ala fin de novëmber él preodü n’audiziun te Consëi provinzial, te chëra che al gnarà inće presentè danü i dać y le model dla reforma sciöche inće valgönes esperiënzes y ejëmpli dles regiuns tla vijinanza de Südtirol.
rc
