Atualità
Dala Junta: Ferata dles recordanzes y Academia dl’Euregio
L’Euregio Tirol-Südtirol-Trentin é stada tl zënter dla sentada edemala dla Junta provinziala da incö (21 d’otober).Le Presidënt Arno Kompatscher à naôta portè dant so bilanz sön la „Ferata tla Galizia“, la scomeciadia organisada dal'Euregio en recordanza dl centenar dla Pröma vera mondiala y che à portè 400 studënć cun la ferata ćina a Krakòw, por presentè daldô le program dl’Academia dl’Euregio.
L’Academia dl’Euregio é un di proieć prinzipai di proscimi mëisc dl GECT (Grup europeich de cooperaziun teritoriala) danter Tirol-Südtirol-Trentin y à sciöche tematica prinzipala „L'alta via dell'Autonomia - radici, sfide e futuro / Gemeinsame Wurzeln – Herausforderungen und Zukunft“. La scomenciadia vëgn organisada adöm ala Fondaziun Alcide De Gasperi y prevëiga trëi fins dl’edema cun seminars y cursc de esperć y oraturs internazionai por 45 porsones sot ai 35 agn sön tematiches zentrales che reverda la cooperaziun transfrontaliera.
„Le pröm terminn sarà a Trënt dai 13 ai 14 de dezëmber, olache al gnarà rajonè de politica, storia y iurisprudënza, dai 11 ai 12 d’aurì dl 2015 sarà l’incuntada a Balsan y al gnarà tignì danter l’ater seminars sön l’economia, la mobilité y i lingać“, à splighè incö, mertesc ai 21 d’otober le Presidënt dla Junta Arno Kompatscher tla conferënza stampa do la sentada edemala dla Junta provinziala. L’Academia dl’Euregio gnarà stlüta jö a Alpach tl Tirol dai 21 ai 23 d’agost, olache les tematiches prinzipales dles incuntades sarà l’archirida, temesc che reverda l’Uniun Europeica y le dagnì. Por informaziuns y iscriziuns: www.euroregione.info/academy.
Tres por ći che reverda l’Euregio à recordè le Presidënt Kompatscher incö le iade cun la ferata dles recordanzes che à portè zoruch sön le Prener incö (21 d’otober) i 400 studënć che à fat pert al iade tla Galizia en gaujiun dl centenar dla Pröma vera mondiala. I studënć, che gnô da dötes les perts dl Tirol storich, à vijité plü posć dla Pröma Vera mondiala y à inće tignì na Festa de comemoraziun a Krakòw cun i trëi presidënć Arno Kompatscher, Günther Platter y Ugo Rossi, olache al é gnü lit dant, danter l’ater, n valgügn pinsiers fora de plü diari de vera de soldas che à combatü tla Galizia tla perioda dla Pröma vera mondiala. „La partezipaziun ala festa de comemoraziun a Krakòw é stada dër bela, n momënt che é jü a cör. I jogn y les jones à menè inant n messaje de pêsc dër important y sterch por n’Europa moderna y zënza confins“, à ajunté Kompatscher.
rc
