Atualità
La lege nöia sön i apalć vëgn elaborada, i investimënć aumentëia
La Junta provinziala é gnüda informada incö (21/10) te süa sentada edemala sön l’elaboraziun dla lege nöia sön i apalć: do la composiziun de n pröm dessëgn de lege gnarà la proposta presentada ales organisaziuns y istituziuns por na debatüda generala por rové a n test contlusif por la fin dl’ann. Intratan él da registrè n aumënt di investimënć invers ai agn da denant.
Le Presidënt dla Provinzia Arno Kompatscher à informè incö (21 d’otober) la Junta provinziala che i laûrs prelimiars di esperć dess gnì stlüć jö por la fin de chësta edema, por podëi mët man daldô cun n dialogh cun les organisaziuns, istituziuns y assoziaziuns interessades: „Dötes les perts interessades arà la poscibilité da fà propostes por miorè le test de basa“, à comentè le Presidënt Kompatscher. Al é preodü che le test de basa vëgnes stlüt jö por la fin dl ann por podëi spo daldô gnì tratè dala comisciun legislativa y dal Consëi provinzial.
Kompatscher à inće respognü incö ales critiches che reverda n intardiamënt eventual di investimënć por gaujia dl’elaboraziun dla lege sön i apalć y che al ne gniss insciö nia plü scrit fora ordinaziuns y bandides de concursc. „Les zifres é la desmostranza che ara ne é nia insciö, i investimënć por le 2014 por ći che reverda l’infrastrotöra dla Provinzia, chël ô dí frabicać, le frabiché abitatif, strades y rëis, prevëiga na spëisa de indöt 342 miliuns de euro“, à dit Kompatscher che à ajuntè, che „tl 2012 ê la soma totala dles spëises 249 miliuns, tl 2013 indöt 203 miliuns. Invers ai ultimi agn é i investimënć chësc ann de 100 miliuns plü alć.“
Inće por ći che reverda les bandides de concursc ne à la lege nöia sön i apalć nia archité l’andamënt. Insciö fossel gnü scrit fora, tres Kompatscher, ti pröms sis mëisc dl 2014 bandides de concursc por laûrs publics y sorvisc cun n valur complessif de 328 miliuns, en confrunt, tl 2013 él gnü scrit fora tla medema perioda bandides de concursc por na soma totala de 321 miliuns de euro. „Ma por ći che reverda le setur dles costruziuns él gnü registrè n smendrimënt di investimënć de 50 miliuns de euro. La gaujia de chësta diminuziun taca adöm cun le scomenciamënt dla legislatöra nöia, inće deache le bilanz provinzial é gnü aprovè valgügn mëisc do le terminn „normal“ di atri agn canche al ne é degun renovamënt dla Junta“, à splighé Kompatscher che à ajuntè che an po constatè chësc fat inće tl tëmp passè pro vigni scomeciamënt de na legislatöra nöia.
„Al ne vëgn insciö nia investì demanco co tl tëmp passè, mo deplü. I laûrs sön la lege nöia sön i apalć ne archita insciö nia i investimënć y gnanca l’andamënt dles bandides di concursc“ à stlüt jö Kompatscher.
rc
