Atualità
Finanzes: La Junta provinziala à aprovè le „Pat de Garanzia“
Le „Pat de Garanzia“, cun chël che al é gnü stabilì le contribut finanziar dl Südtirol al ressanamënt dl debit publich statal, é gnü aprovè incö (21/10) dala Junta provinziala. Le „Pat de Garanzia“ é le documënt de contlujiun dles tratatives danter la Provinzia y le Govern por le finanziamënt dl’autonomia tl dagnì.
La Junta provinziala de Trënt à aprovè inier, lönesc ai 20 d’otober l’acordanza danter le Stat y la Provinzia de Trënt por le contribut al ressanamënt dl debit publich dl Stat talian, incö (21/20) à la Junta provinziala de Balsan dè jö so arat positif sön le pat de garanzia danter Provinzia y Stat. „I pënsi che i contignüs dl’acordanza é intratan conesciüs. Cun le Pat de Garanzia unse definì te na manira tlera le contribut che le Südtriol mëss dè jö tl dagnì y chësc nes garantësc segurëza iuridica y na planificaziun sigüda de dorada lungia“, à comentè Kompatscher incö y à ajuntè che le contribut finanziar tl dagnì sarà cotan plü mënder de chël che le Südtirol mëss dè jö atualmënter.
Cun l’aprovaziun da pert dla Junta provinziala à le Presidënt dla Provinzia insciö la lizënza formala da sotescrì le pat de garanzia por la Provinzia de Balsan, adöm al Presidënt dla Provinzia de Trënt Ugo Rossi y le Premier Matteo Renzi. Le premier talian gnarà inće inćiarié da comuniché le contignü dl’acordanza ala Republica dl’Austria. Por avëi potesté iuridica messarà le pat ćiamò gnì formulè tres articui por podëi gnì inserì insciö tla lege de stabilité dl Govern.
rc
