Atualità
Dé di Museums dl Tirol storich ai 24 d’otober - Congrès a Trënt
Co pon pa comuniché la Gran Vera y i avenimënć dl 20ejimo secul ti ambiënć museai d'aldedaincö? A chësta domanda ti jaran do tratan l’ediziun de chësc ann dl „Dé di Museums dl Tirol storich 2014". L’incuntada transfrontaliera metüda a jì dal’Euregio Tirol-Südtirol-Trentin gnarà tignida por esperć dla cultura y di museums en vëndres ai 24 d’otober tles galeries dl Piedicastello a Trënt.
Le centenar dal scomenciamënt dla Pröma Vera mondiala tl 1914 é chësc ann tl zënter dl „Dé di Museums dl Tirol storich“ y la tematica gnarà aprofondida tres n’incuntada de esperć y storics a Trënt en vëndres ai 24 d’otober. La tematica zentrala sön chëra che al gnarà debatü é la comunicaziun dla Gran Vera y di avenimënć dl 20ejimo secul tres les sperses di museums d’aldedaincö. („Das Museum als Raum, um den 'Großen Krieg' und das 20. Jahrhundert im 21. Jahrhundert zu verstehen / Comunicare la Grande Guerra e il 1900 nel XXI secolo. Lo spazio dei musei.") Plü museums de Trënt presentarà en chësta ocajiun tres ejëmpli concreć so punt d’odüda sön la tematica.
Le congrès organisé dal’GECT-Euregio por le cuinto „Dé di Museums dl Tirol storich“ gnarà daurì
en vëndres, ai 24 d’otober 2014
dales 09.00
tla „Galeria Piedicastello“ a Trënt
en presënza di assessurs Florian Mussner (cultura ladina y museums), Tiziano Mellarini (cultura – Trentin) y Beate Palfrader (cultura – Tirol). Do les parores de salüd di assessurs gnaral portè dant da plü referënć na seria de referać, danter l’ater da Wacław Szczepanik dl Istitut por la Storia dl Museum Tarnów (che rajonarà dla Gran Vera tla Galizia y dl'interpretaziun storica d’aldedaincö dla Pröma vera mondiala tla Polonia), dai storics y esperć Andrea Di Michele (diretur general dl „Museo Storico del Trentino“), Giuseppe Ferrandi (suranstant dl „Museo storico della Guerra di Rovereto“), Camillo Zadra y Cristiana Collun (direturia MART).
rc
