Atualità
Scioper di feratiers indoman: Al é preodü che plü ferates toma fora
Les ferates regionales de Trenitala y de Trenord, sciöche inće ferates suraregionales de Trenord, podarà tomè fora o passè te intervai nia regolars indoman vëndres, ai 24 d’otober dales 9 ales 17 por gaujia de n scioper di feratiers. Sciöche anunziè dala Repartiziun Mobilité dla Provinzia é inće le personal dla SAD cherdè sö a n scioper por indoman por 24 ores y che dess mët man incö a mesanöt.
Indoman, vëndres ai 24 d’otober él le personal de Trenitalia y de Trenord cherdè sö da scioperè dales 09:01 ales 16:59. Les ferates regionales de Trenitalia y de Trenord, sciöche inće les ferates suraregionales de Trenord, podarà tomè fora o passè cun n orar nia regolar. N sorvisc minimal gnarà garantì.
Inće le personal di sorvisc dla SAD é cherdè sö da scioperè indoman. Le sindacat USB à anunziè n scioper de 24 ores por indoman vëndres 24 d’otober. Sciöche al vëgn comuniché dala SAD gnaral garantì na seria de ferates indoman dales 6 ales 9 dadoman y dales 18 ales 21 sön les lignes Franzensfeste – Sanćiana, Prener – Balsan, Balsan – Maran y Maran – Mals. Na lista cun les ferates garantides é gnüda injuntada.
Plü informaziuns pon ciafè tres les plates internet http://www.fsnews.it/, http://www.trenitalia.com/ y http://www.trenord.it/, sciöche ti ofizi tles staziuns.
rc
