Atualità
Proteziun zivila: La comunicaziun miorëia tres na rëi radiofonica digitala
Miorè l’efiziënza tla comunicaziun y smendrì i cosć dla manutenziun: l'assessur por la Proteziun zivila Arnold Schuler à presentè incö (24/10) adöm al diretur Hanspeter Staffler y al coordinadù Markus Rauch l'istalaziun de na rëi radiofonica unitara y digitala (TETRA) de comunicaziun por les organisaziuns dla Proteziun zivila y di sorvisc de pröm aiüt de volontariat che porta para de plü vantaji.
Por gaujia dles esigënzes desfarëntes de comunicaziun adora la Proteziun zivila dl Südtirol por le momënt indöt 51 rëis radiofoniches: chësc fat porta para n aumënt di cosć por la gestiun dles rëi dla radio y complichëia la colaboraziun danter les unitês operatives tratan i intervënć dla Proteziun zivila. N salt de cualité tla comunicaziun vëgn śëgn fat cun l’istalaziun y l’adoranza dla rëi digitala TETRA, na rëi unitara por dötes les aplicaziuns dla comunicaziun tres radio, che dess portè a na comunicaziun plü asvelta danter les unitês operatives dla Proteziun zivila y di sorvisc de pröm aiüt de volontariat che de conseguënza porta a mioramënć tratan les operaziuns de pröm aiüt. L’istalaziun dla rëi Tetra, süa funziun y sü vantaji é gnü presentà incö, vëndres ai 24 d’otober dal’assessur por la proteziun zivila Arnold Schuler y dal responsabl Hanspeter Staffler tla sënta prinzipala dla Proteziun Zivila a Balsan.
„La Proteziun Zivila dl Südtirol s’anuzëia por le momënt de indöt 51 rëis radiofoniches por rajiuns de comunicaziun plü desvalies; chësc fat arfera la colaboraziun dles unitês operatives y aumentëia i cosć por la manutenziun“, à splighé incö le Diretur dla Repartiziun Hanspeter Staffler. La rëi radiofonica nöia TETRA sarà digitala y prevëiga la poscibilité da comuniché tl medemo momënt danter organisaziuns che s’anüza dla rëi y da trasmët dać. Cun chësc sistem nü podarà les unitês operatives de plü organisaziuns comuniché diretamënter öna cun l’atra y dötes adöm: por ejëmpl podarà insciö i assistënć y colaboradus dl pröm aiüt, dla crusc blancia, dl’aiüt alpin y di stödafüch s’acordè damì sön les prozedöres tratan n’intervënt, ći che é de gran importanza por le salvamënt dles porsones y aumentëia les poscibilitês de n intervënt y de na cura miù coordinà. Implü portarà l’anuzamënt dla rëi radiofonica TETRA inće a n smendrimënt di cosć de manutenziun.
"Sciöche vigni rëi radiofonica mobila alda lapro pro la rëi TETRA aparać radiofonics, posiziuns de trasmentënza y server", à dit Staffler. Le pröm lot é tl laûr de gnü stlüt jö, é gnü assegnè por 4,7 miliuns de euro y contëgn 56 posiziuns de trasmentënza, öna na zentrala y i aparać radiofonics nezesciars, à splighé Markus Rauch, coordinadù di sorvisc prozinzial di coliamënć radiofonics.
Tetra é n emitënt radiofonich digital che vëgn adoré sciöche tecnologia de comunicaziun radiofonica tl setur dla Proteziun zivila y dales istituziuns responsables por la segurëza publica. Al vëgn adorè dandadöt dai stödafüch, dai sorvisc de pröm aiüt, dal aiüt alpin, dala polizia y dai organisaziuns por le trafich. Le sistem digital TETRA garantësc n azès, na desponibilité y n’afidabilié sön döt le raiun provinzial tres na zifraziun di dać. La rëi radiofonica digitala nöia po implü inće gnì integrada tla rëi telefonica dla Provinzia y pormët insciö na comunicatiun inće cun porsones che ne fej nia pert de organisaziuns dla Proteziun zivila tres la telecomunicaziun. Por ći che reverda l'incuinamënt eletronich é la potënza de trascmisciun di dać gnüda tignida le plü bas poscibl, l’esposiziun a raiaziuns tres la tecnologia Tetra é tla pert plü daimpò ala tera dlungia les stangies dl’antëna cun n altëza de sura 20 mëtri dër pićera y cotan sot le limit autorisè.
rc
Galaria dales fotografies
