Atualità
Tiers salvari sön le iade: Mostra nöia „Lëdi y salvari“ tl Museum Natöra
Sensibilisé sön le mantignimënt dla biodiversité tles Alpes tres fotografies sön i spostamënć de tiers tl’America: Chësc é un di fins prinzipai dla mostra speziala „Lëdi y salvari" de Florian Schulz che é gnüda daurida inier tl Museum Natöra a Balsan. Ara resta daverta ćina ai 13 de setëmber 2015. I tesć dla mostra é da ciafè te cater lingac.
Milesc de caribù, les renes dl’America dl Nord che se mët sön le tru por les spones dl’Alasca olache ares s’architarà por l’isté, les alćes dla nëi che jora sura l’America dl Nord cuntra le Canada o la Groenlandia y na laûrs kermode dla Great Bear Raiforest che prô da pié pësc: chëstes é ma n valgönes dles scenes che le fotograf Florian Schulz à documentè te sü stüdi fotografics da vint agn incà sön i spostamënć di tiers te passaji naturai ti raiuns dl'America dl Nord. 40 de sües fotografies à Schulz metü a desposiziun por la mostra speziala „Lëdi y salvari“ dl Museum Natöra Südtirol, che é gnüda daurida inier, lönesc ai 27 d’otober a Balsan. La mostra é partida sö te ot staziuns multimediales y trata les migraziuns di tiers salvari tl’America dl Nord en raport cun la destribuziun di tiers tles Alpes, dandadöt tl Südtirol. Insciö él inće da odëi retrać de spostamënć de cerf, laûrs, olps, vicì migradus ti raiuns alpins. „La migraziun di tiers é na tematica de interès global y che cun chësta mostra oressun inserì chësta tematica globala inće te n contest local“, à splighé inier, lönesc ai 27 d’otober tratan l’inauguraziun le Diretur dl Museum Natöra Vito Zingerle. Por Valentino Pagani, Diretur dl Departimënt Museums contribuësc la mostra a „sensibilisé sön l’importanza dla sconanza dla biodiversité te nüsc raiuns naturai dles Alpes.“ Presënt ala daurida dla mostra êl inće le fotograf Florian Schulz y la curadëssa Johanna Platzgummer. I tesć dla mostra é te cater lingac: ladin, todësch, talian y inglesc.
La sensibilisaziun sön l’importanza dla conservaziun de passaji natuari sciöche habitat de proteziun por families de tiers é un di obietifs dles operes de Florian Schulz. Le coliamënt tres passaji naturai é na forma de mantignimënt dla biodiversité, dlungia la forma oramai tlassica di parcs naturai sciöche raiuns de proteziun dla natöra. N fautur de prigo por le smendrimënt dla biodivesité é, tres i stüdi scientifics di biologs Robert MacArthur y Edward Osbone Wilson, le mudamënt dla contrada y di ambiënć naturai tres la costruziun de infrastrotöres (autostrades, ferates, citês,..) che porta a n isolamënt di ambiënć naturai. Por la migraziun de tiers salvari é insciö la presënza de passaji naturai un di bojëgns por se mëte sön le iade y se mantignì tl tëmp.
La mostra fotografica „Lëdi y salvari“ é daverta al publich dai 28 d’otober 2014 ai 13 de setëmber 2015, tres dal mertesc ala domënia dales 10 – 18. Implü él preodü scomenciadies por mituns y tlasses scolastiches sciöche inće por families y grups. La cherta d’entrada costa 4 euro (5 euro adöm cun la vijita al museum), 8 euro é le prisc d’entrada por families. Por informaziuns plü avisa y prenotaziuns: Museum Natöra Südtirol, tel. 0471 412964 o tel. 0471 412975, web http://www.museonatura.it/.
Le fotograf todësch Florian Schulz é nasciü tl 1975, laôra da passa 20 agn ti Stać Unis d’America sciöche mëmber dl International League of Conservation Photographers (ILCP). Süa plata internet personala é da ciafè sot ala misciun: www.visionsofthewild.com. Al colaborëia cun BBC Wildlife, National Geographic, GEO.
Videos dl artist:
- Freedom to Roam: https://vimeo.com/3791163
- Welcome to the Arctic: https://vimeo.com/28173392
- Sön le iade por fotografè laûrs blancies por le National Geographic: https://vimeo.com/49498616
- Sön le iade por fotografè laûrs blancies cun Florian Schulz (SWR tv): https://vimeo.com/75473431
- Aventöra ti raiuns dl'Artida (reportaje televisif): https://vimeo.com/75469885
rc
Galaria dales fotografies
Foto: Repartiziun Museums
