Atualità
Acoliënza di profugs: Conferënza stampa de Kompatscher y dl vësco Muser
Le Presidënt dla Provinzia Arno Kompatscher, l’assessuria Martha Stocker y le vësco Ivo Muser tignarà na conferënza stampa en lönesc, ai 3 de novëmber dales 11:00 a Balsan, tratan chëra che al gnarà presentè na suraodüda dla situaziun atuala di profugs y dl’acoliënza di profugs tl Südtirol.
Prësc vigni dé röiel adalerch sön les costes dl mer dla Talia barches cun porsones che s’un sciampa, i zëntri d’acoliënza é plëgns surafora y les porsones che röia adalerch vëgn insciö partides sö sön i zëntri d’acoliënza sön döt le teritore dla Talia, inće tl Südtirol.
Por podëi ti pité a chëstes porsones les mius condiziuns poscibles por ći che reverda l’acoliënza y l’assistënza primara laôra la Provinzia de Balsan adöm cun la diozeja de Balsan-Porsenù y cun le Comissariat dl Govern, les forzes dl ordinn y les organisaziuns soziales. „Al é n dovëi umanitar daidé les porsones che s‘un sciampa y garantì nosc contribut y pité l’aiüt che va debojëgn“ sotlignëia le Presidënt dla Provinzia Arno Kompatscher y l’assessuria por les politiches soziales Martha Stocker.
Adöm cun le vësco Ivo Muser presentarà le Presidënt Kompatscher y l’assessuria Stocker na suraodüda dla situaziun atuala dl’acoliënza di profugs tl Südtirol te na conferënza stampa
en lönesc, ai 3 de novëmber
dales 11
tla ćiasa Frëinademetz
strada Frëinademetz 11
a Haslach (Balsan).
Al’incuntada cun i media tolarà inće pert i rapresentanć dla Caritas y de Volontarius, döes organisaziuns che à en gestiun, sön inćiaria dl Stat y dla Provinzia, i sorvisc d’acoliënza di profugs tl Südtirol.
rc
