Atualità
L’asse.ria Stocker ti à presentè la reforma dla sanité ai doturs de familia
Inier, lönesc ai 27 d’otober ti à l’assessuria por la sanité Martha Stocker presentè ai doturs de familia les diretives dla reforma dl’assistënza sanitara tl Südtirol y à ascuté sö sües minunghes. Na seria de doturs da döt le Südtirol à tut pert al’incuntada por portè dant sües propostes.
Do les presentaziuns dles diretives dl’assistënza sanitara tl Südtirol 2020 al personal di raiuns sanitars te düć i set ospedai dla Provinzia ti à l’assessuria por la sanité Mario Stocker portè dant inier (lönesc ai 27 d’otober) ai doturs de familia te n’incuntada a Balsan sües propostes de reforma dl sistem sanitar tl Südtirol.
Tröc é insciö stà i doturs da döta la Provinzia che à tut sö l’invit y é gnüs a Balsan por s’informè sön i contignüs y sön les novitês dles diretives laurades fora ćina śëgn. La presentaziun é gnüda portada dant te n‘atmosfera costrutiva, y i doturs presënć a anuzè l’ocajiun por ti portè dant al’assessuria Stocker sües propostes y sü dejiders. I doturs à portè dant inće sü dübi, dandadöt por ći che reverda l’aplicaziun dl contrat coletif dl laûr y dla lege „Balduzzi“ che i doturs de familia ne arata nia adatada ala realtè locala tl Südtirol. Aspeć critics é inće gnüs portà dant por ći che reverda les novitês preodüdes sön livel nazional tres la lege Balduzzi, por ejëmpl por ći che reverda l’istituziun di zëntri dla sanitè „Gesundheitszentren“ y la creaziun de ambulatori coletifs de plü doturs cun n’assistënza permanënta y na reperibilité di doturs 24 ores sön 24.
I doturs à sotligné dandadöt che tl Südtirol él de gran desfarënzies por ći che reverda le laûr te de piceres zones rurales de pici comuns en confrunt ai zëntri abitatifs dles citês: chësc fat messass l’orientamënt nü dl’assistënza sanitara tó en conscidraziun. Modì de assistënza che funzionëia bun por Balsan o Maran ne po nia gnì aplicà un a un inće tles zones rurales.
Tratan l’incuntada él inće gnü portè dant plü iadi la chestiun dla manćianza de doturs, che é gnüda inće anotada a livel europeich. Öna dles propostes che é gnüdes fates te chësc vers é por ejëmpl n sostëgn finanziar publich ai doturs jogn por ti alisiré l’inserimënt tl monn dl laûr. L’assessuria Stocker à por ejëmpl fat la proposta da ti mëte a desposiziun ai doturs jogn ofizi ti raiuns sanitars sciöche ambulatori.
Düć i presënć é stà a öna por ći che reverda n slariamënt dla rëi d’informaziun danter i doturs de familia y che la medijina primara dess gnì revalutada. Insciö podèssel nasce por ejëmpl formes d’organisaziun nöies, sciöche por ejëmpl na medeijina de grup, zëntri por la sanité, n renforzamënt dla prevenziun y n aumënt dla colaboraziun danter le personal spezialisé y i doturs.
L’assessuria Stocker à dit d’ester contënta dla gran partezipaziun al’incuntada y à rengrazié por les propostes y idees: „Un de mi dejiders prinzipai é chël da aumentè l’identificaziun di doturs de familia y di mituns cun le sistem sanitar dla Provinzia. Nosta ghiranza é chëra che la medejina de basa toles ite chël rode fondamental che ti speta por ći che reverda l’assistënza sanitara a nüsc zitadins“, à dit Stocker.
I direturs di raiuns sanitars laôra fora por le momënt adöm cun i rapresentanć di Comuns plü propostes da inserì tl program de reforma dl’assistënza sanitara. La definiziun dl proiet contlusif é preodüda por la fin dl’ann.
rc
Galaria dales fotografies
Foto: USP
