Atualità
L'ass. Theiner mët sö regoles nöies por les pices dejotes y chëres mesanes
Na gran desburocratisaziun, na majera transparënza y n’adoranza dla forza dl’ega dess ester les conseguënzes dla regolamentaziun nöia sön les conzesciuns de de pices derivaziuns y de chëres mesanes, che é gnüda presentada incö (29/10) dal assessur provinzial Richard Theiner.
L’assessur provinzial Theiner à dër laldè le laûr dla la grup dl‘energia, che à laurè fora les regoles nöies por la conzesciun de de pices dejotes y dejotes mesanes sot trëi megawatt.
"Le resultat po se lascè odëi", à sotrissé l’assessur provinzial Theiner pro la conferënza stampa da incö, mercui ai 29 d'otober. Les desposiziuns nöies dess portè pro a na gran desburocratisaziun, dantadöt por les pices dejotes sciöche por ejëmpl tl caje de mêsc de munt, olache les conzesciuns gnarà arlungiades automaticamënter.
Pro les pices dejotes dl’ega vëgnel aladô dla regola nöia desfarenzié tl dagnì danter dër de pices dejotes ćina 220 kW y dejotes mesanes da 220 a 3000 kW. Theiner à definì n travert le fat che les dejotes mesanes vegn aratades de interès publich y che al mëss inće gnì dè fora scioldi publics por chëstes. "La prassa à mostrè che avisa les dejotes mesanes dantadöt te raiuns periferics dla provinzia à n rode fondamental por la segurëza dal fornidöra de strom", à dit Georg Wunderer, le cordinadù dl grup dl’energia.
Wunderer à sotrissé cun dać l’importanza di pici implanć idroeletrics y de chi mesans por la produziun de strom tl Südtirol. Al momënt él 784 de pici implanć (ćina 220 kW), che prodüj 192 miliuns de kilowattores de strom al ann. Chël é le 3,2 porcënt dla produziun dla forza dl’ega tla provinzia. I 146 implanć idroeletrics mesans (da 220 a 3000 kW) prodüj 806 miliuns de kWh al ann. Chël é le 13,3 porcënt dla produziun dla forza dl’ega tl Südtirol.
Flavio Ruffini, le diretur dl’Agenzia por l’ambiënt à baié de d’atres novitês importantes. Les assoziaziuns storiches, metüdes sö da comunitês de zitadins por la fornidöra d’ega te raiuns dezentralisà, dess gnì sostignides a na moda particolara. Inće ala sconanza dl’ega déssel ti gnì dè plü importanza.
"Tres regoles tleres por dè jö proieć, decursc plü cörć y la surandada dla responsabilité ai manajadus déssel ester na majera trasparënza y cotan manco burocrazia", à dit Ruffini. La Provinzia fajess spo ma plü i controi che va debojëgn. Les perts ê a öna che le Südtirol à n rode dër important cun la strategia tlimatica "Energia-Südtirol-2050" tl raiun dles Alpes. "Chësc rode orunse laurè fora y porchël é n’adoranza inovativa y sostenibla dla forza dl’ega dër importanta", à dit l’assessur provinzial Theiner tratan la conferënza stampa.
Les desposiziuns nöies ti vëgn śëgn lasciades alsavëi ala junta provinziala y spo vëgneres ejaminades dala Comisciun legislativa dla Provinzia. Daldô ti vëgnel dè le dessëgn de lege al Consëi provinzial por gnì aprovè.
rc
