Atualità

La Junta provinziala à aprovè inier, mertesc ai 28 d’otober, le bilanz de previjiun y le dessëgn por la lege finanziara por le 2015. La soma dl budget é de 5,3 miliarg de euro, 4,6 miliarg de chisc – na soma de 1,8 porcënt plü alta co l’ann passè 2014 – podarà gnì adorà efetivamënter. L’aumënt dles ressurses finanziares a desposiziun é na conseguënza dl svilup economich plü vantajus tl Südtirol en proporziun al svilup economich tl rest dla Talia.

Le bilanz de previjiun 2015 é ćiamò n budget de transiziun che dauriarà spo la strada a na revijiun totala dla spëisa publica („zero-based budgeting“). „La Junta provinziala s’à orientè tratan la formulaziun dl bilanz de previjiun a dui prinzips: daimpröma, por ći che reverda les entrades, a chël dla creaziun de alisiraziuns fiscales por i zitadins y les aziëndes y al aumënt de investimënć por ći che reverda les spëises“, à splighé Kompatscher. 

Bele ti agn passà à la Junta provinziala aprovè alisiaraziuns tres sües competënzes por ći che reverda les cutes locales. Tres chësta mosöra finanziara à i zitadins y les aziëndes podü sparagnè ti ultimi agn soporjö 160 miliuns de euro. „Dlungia a chësta soma de 160 miliuns de euro él preodü por le bilanz de previjiun 2015 implü alisiraziuns por indöt 94 miliuns de euro tres l’arbassamënt de cutes o l’esenziun de cutes. Al gnarà fat intervënć por ejëmpl sön la cuta IRAP, la cuta comunala sön i imobiliars (GIS, IMI) y la cuta sön le davagn IRPEF“, à dit incö Kompatscher. Esenziuns fiscales é preodüdes danter l’ater por proieć de produziun nüs da pert de organisaziuns onlus, por assoziaziuns de promoziun soziala y por aziëndes publiches che pita sorvisc por porsones.  La soma complessiva dles alisiraziuns tres la reduziun o l’esenziun dles cutes por le bilanz de previjiun 2015 é insciö de 254 miliuns de euro.    

Öna dles mosöres por podëi aumentè i investimënć sarà la reduziun dles spëises. „Les spëises atutales gnarà diminuides dl cin porcënt. La Junta provinziala à inće stabilì te chësc vers plü seturs olache al ne gnarà nia atuè smendrimënć por promöie y tutelè süa ativité: la sanité, les politiches soziales, l’istruziun y i comuns“, à splighè Kompatscher. „Mo inće por ći che reverda i investimënć sön la rëi stradala o por paié zoruch i aretrać dles domandes de contribuć tl setur dla promoziun economica unse na desponibilité finanziara de cinch/sis porcënt maiù co l’ann passè“. Dal 2012 é la porzentuala di investimënć tl bilanz provinziala aumentada dal 25 porcënt al 33 porcënt.

Na majera desponibilité finanziara gnarà inće garantida por le 2015 por ći che reverda le setur dl frabiché alisiré. L’aumënt da 100 (ann 2014) a 105 miliuns é n resultat concret dles tratatives finanziares cun le govern zentral. Plü ressurses finanziares ti po insciö gnì garantides inće ales infrastrotöres y ala cultura. „Chisc mesi finanziars ne é nia ćiamò preodüs dal bilanz de previjiun mo gnarà tuć en conscidraziun dala comisciun legislativa dl Consëi provinzial“, insciö Kompatscher.

Do l’aprovaziun da pert dla Junta provinziala gnarà le bilanz de previjiun valutè dal Consëi di Comuns y spo menè inant al Consëi provinzial. Dai 10 ai 14 de novëmber él preodü la discusciun dl bilanz de previjiun da pert dla comisciun legislativa dl Consëi provinzial, Kompatscher presentarà süa relaziun dl bilanz plüssigü ai 12 de dezëmber. Daldô él preodü la discusciun y aprovaziun dl bilanz y dla lege finanziara da pert dl plenum dl Consëi provinzial.