Atualità
Sport sciöche materia de scora: Al ti é gnü surandè na petiziun a Achammer
N grup de laûr ti à surandè na petiziun cun indöt 1745 firmes al’assessur Achammer cun la ghiranza da arjunje le reconoscimënt dles ativitês sportives extra-scolastiches sciöche materia facoltativa dl percurs didatich. „Al é öna dles mies prioritês da colié de plü les ofertes sportives cun l’ativité scolastica“, à dit l’assessur, che presentarà tosc na proposta de soluziun.
Le grup de laûr por "le reconoscimënt dles ativitês sportives extra-scolastiches sciöche materia facoltativa de scora" ti à surandè da püch al’assessur Philipp Achammer, tres süa suranstanta Petra Pichler, na petiziun sotescrita da 1.745 porsones che se damana, che les ativitês sportives extrascolastiches di scolars vëgnes reconesciüdes te dötes les scores sciöche materia facoltativa de scora. La situaziun atuala prevëiga che vigni istitut po to singolarmënter la dezijiun da reconësce chëstes ativitês y che al vëgn insciö inće tut en conscidraziun cursc pità diretamënter dales scores o dales scores de musiga. I argomënć por arjunje chësc obietif é, tres la petiziun, danter l’ater l’importanza dl sport por l’aprendimënt, l’incrujada dles ofertes extrascolastiches cun les materies facoltatives, la manćianza de palestres y de posć adatà tles scores y la manćianza de movimënt da pert di mituns y dles mitans. L’assessur Achammer à dit da ester a öna cun les rajuns portades dant.
„Inće sce nosta regiun vëgn conscidrada sciöche dër „sportiva“ él gnü registré ti ultimi agn n trend che porta a n smendrimënt dl’ativité sportiva. Nosta inćiaria é da invertì chësta tendënza tres les scores y l’oferta formativa“, à dit Achammer. Na colaboraziun danter les scores y les assoziaziuns sportives podess ester na soluziun poscibla, inće deache les assoziaziuns podess dè so contribut „da defora“ tratan les ores d’educaziun fisica y inće deache la manćianza de movimënt ne po nia ma gnì curida ma dales ores d’educaziun fisica tles scores, insciö Achammer che à ajuntè che le reconoscimënt dles ativitês pitades dales assoziaziuns sportives podess insciö portè a n mioramënt dla situaziun.
„I sa che la chestiun dl reconoscimënt dl’ativité sportiva extra-scolastica é n problem da plü agn, mo i porvarà da ciafè na soluziun tignin cunt di punć d’odüda desvalis“, à stlüt jö Achammer.
rc
