Atualità
Otober: Ćialt sura le valur mesan – Ona de frëit ti ultimi dis
Le mëis de otober, che se röia cun incö, jarà ite tla storia dl tëmp sciöche n mëis plü ćialt co le valur mesan. Cotan plü altes co mesanamënter é stades les temperatöres dandadöt tles prömes trëi edemes, la presënza de niores à portè implü a n mënder arbassamënt dla temperatöra tratan les nöts. Le Sorvisc meteo à mosorè temperatöres che s’avijinëia al valur mesan ma tl’ultima edema d’otober.
„A Balsan él gnü mosorè tratan le mëis d’otober na temperatöra mesana de 15,1°, le valur mesan di ultimi agn é de 12,8°“, spliga i meteorologs dla Provinzia. Cun chësc valur mesan é le mëis d’otober dl 2014 le cuarto plü ćialt da 165 agn incà. Inće ti atri raiuns dla Provinzia é stà i valurs mosorà mesanamënter dai 1,5° ai 2° plü alć co ti ultimi agn.
La temperatöra plü alta é gnü mosorada ai 2 de otober a Branzoll, olache al é gnü registrè 25°. La temperatöra plü bassa indere é gnüda mosorada a Sterzing inier, ai 30 d’otober, cun manco 4,7°. Sön les munts altes, plü avisa sön la Schöntaufspitze a 3330 metri d’altëza sura le livel dl mer, él gnü registrè la temperatöra plü basa ai 22 d’otober cun n ona de frëit che à portè a manco 15,2°. Öna dles carateristiches prinzipales dl tëmp di ultimi mëisc é stada la manćianza de sorëdl: le mëis d’otober é jü, dandadöt ti ultimi 15 dis, cuntra chësta tendënza y à trat para, tres l’influs de na presciun alta, tröpa löm de sorëdl.
Por ći che reverda les prezipitaziuns él gnü registrè tres le Sorvisc meteo dla Provinzia dać desfarënć: tl süd y tl vest dla Provinzia él stè plü süt co mesamënter (27 milimetri a Maran impede de 76 milimetri), tla Val de Puster y tla Val d’Isarch él gnü jö plü plöia y/o nëi co normalmënter (a Bornech por ejëmpl él gnü mosoré 114 milimetri impede co le valur mesan de 66 milimetri).
I evënć plü significatifs dal punt de odüda dl tëmp tl mëis d’otober é stà n front de n temporal y na novüda danter i 21 d’otober y i 23 d’otober: naôta él rové tl Südtirol na ona de frëit cun sböres de vënt y n ativitè dër alta de tarlis (1449 tarlis) por otober. Daldô él gnü registrè tl nord y dl ost dl Südtirol na ona de frëit intensiva cun novüdes ćina jö a 700 metri sura le livel dl mer. Al à noü por ejëmpl inće a Bornech, sura i 2000 metri tles vijinanzes dla cité él gnü jö 40 ćina 50 zentimetri de nëi frësca.
„Gnissant y le Dé dles Animes ne sarà nia caraterisà dal tëmp tlassich dl mëis de novëmber. Le bel tëmp da d’altonn romagnarà inće tratan le fin dl’edema, cun le metëman dla proscima edema se müda les previjiuns cun dis plü grisc y da plöia“ à splighé i meteorologs dla Provinzia.
rc
