Atualità
Incuntada al Eurac danter doturs y scienzà che laôra foradecà
Incö danmisdé, vëndres ai 31 d’otober, él gnü tignì tla sënta dl Eurac a Balsan n’incuntada danter l’assessuria Martha Stocker cun doturs y scienzà südtirolej che laôra foradecà y te d’atres regiuns talianes. L’incuntada é gnüda organisada dal’assoziaziun Südstern, tl zënter dla debatüda él stè l’orientamënt dl proiet de reforma dla sanité tl Südtirol.
L’incuntada "Südstern Health and Science Forum Südtirol" é gnüda organisada chësc ann por le secundo iade dal’assoziaziun Südstern y prevëiga la partezipaziun de profescionisć südtirolej che laôra foradecà. Dan le convëgn da incö (vëndres 31 d’otober) él gnü tignì tl Eurac a Balsan n’incuntada cun l’assessuria por la sanité y les politiches soziales, Martha Stocker, tratan chëra che al é gnü presentè le proiet de reforma dla sanité provinziala.
L’assessuria Stocker ti à insciö cuntè ai partezipanć dl convëgn dles incuntades y di confrunć che ara à albü tles ultimes edemes cun i responsabli y i operadus dla sanitè por definì le svilup dl’assistënza sanitara provinziala da incö al 2020.
„Dales incuntades y dal confrunt cun i esperć dl setur él gnü fora te na manira tlera la convinziun da pert dla maiù pert di partezipanć che na reforma dla sanité provinziala va debojëgn por podëi garantì tl dagnì la sostenibilité y le finanziamënt dl’assistënza publica tl Südtirol“, à sotligné l’assessuria Stocker che à injuntè che „por reformè l’aparat sanitar val debojëgn de na reorganisaziun sön düć i livì. Implü messaràl gnì definì te na manira tlëra cares che é les competënzes dl Assessorat y cares che é chëres dl’Aziënda sanitara. Insciö saràl poscibl da mët adöm sinergies y da costruì na rëi efiziënta danter les strotöres por eliminè cosć dopli y spaterlades potenzian i sorvisc sön le teritore.“
„Te chësc cheder messaràl implü gnì identifiché y valorisé chi sorvisc che po garantì n aumënt dles entrades por la sanité provinziala,“ à dit inant l’assessuria Stocker che à insciö invié düć i partezipanć, che laoran foradecà à conesciü plü realtês a livel international, da fà propostes.
Al à tut pert al’incuntada le presidënt dl’Eurac Werner Stuflesser, le diretur dl Zënter de biomedejina dl’Eurac Peter Pramstaller, Stefan Zerbe (LUB), le diretur Günther Mathà, la vize-direturia dl setur archirida Susanne Elsen, le diretur dl Zënter de sperimentaziun dla Laimburg Michael Oberhuber y la responsabla por l’archirida Jennifer Berger.
rc
