Atualità
Tl Südtirol él 72 iagri nüs (8 ëres y 64 ëi)
8 ëres y 64 ëi à passè da püch l'ejame da ćiacia tl Südtirol: a la maiù pert de chisc ti él gnü surandè incö (31 d’otober) tl Kolpinghaus a Balsan dal assessur provinzial Arnold Schuler l’atest d’abilitaziun por l’eserzize dl’ativité da iagher.
Inće l’ejaminaziun de chësc ann por l’abilitaziun da podëi eserzité l’ativité da iagher à confermè la complessitè dles proes sides por ći che reverda l’aspet teoretich che por chël pratich. 195 é stà i candidać che s’à presentè ales proes da stlopeté y a chëres a usc, mo indöt él ma stè 72 i partezipanć che à passè l’ejam da iagher. Les ëres che à superè l’ejaminaziun é indöt 8, 64 é stà i ëi.
Tratan la surandada di atestać incö (31 d'otober) tl Kolpinghaus a Balsan à l’assessur Arnold Schuler sotligné l’importanza dl ejame da ćiacia dandadöt por garantì che i iagri nüs ais na conescënza adatada por podëi eseguì l’ativité sides por ći che reverda l'aspet sportif che chël ambiental. „Tres la ćiacia dessel gnì evitè danns al agricoltöra y maraties pro i tiers. Al é important da se tignì tres ales regoles inće por sconè la natöra, i tiers y l’agricoltöra“, insciö Schuler.
Le diretur dla Repartiziun Bosć Paul Profanter à recordè tratan so discurs che i iagri à na tradiziun lungia inće por ći che reverda les usanzes y le vistimënt da ćiacia. „Tl dagnì saral important da ciafè na balanza danter les esigënzes di iagri y chëres di patruns di grunć por sconè l’ecologia", insciö Profanter.
Andreas Agreiter, diretur dl Ofize Ćiacia y pëscia à plü inant presentè na seria de dać y zifres sön la ćiacia tl Südtirol: 195 candidać s’à presentè chësc ann da d'altonn al’ejame, ala fin à passè 8 ëres y 64 ëi dötes les proes (72 indöt). Tl Südtirol é le numer di iagri passè da 5169 tl ann 1995 a 6002 aldedaincö; l’eté mesana di iagri é de 53 agn y les ëres rapresentëia le 5 porcënt de düć i iagri, les profesciuns plü rapresentades amesa i iagri é i artejans, i paurs y i pensionisć; les resserves de ćiacia tl Südtirol é 145, chës privates 51.
rc
Galaria dales fotografies
