Atualità
Kompatscher y le vësco Muser sön la situaziun di profugs: Nia stlü i edli
Daidé les porsones che é sciampades da situaziuns de prigo ne é nia ma n compit istituzional mo n at de solidarieté y de umanité da pert de vigni zitadin: Chësc é stè l’apel portè dant incö (03/11) dal Presidënt Arno Kompatscher y dal vësco Ivo Muser te na conferënza stampa a Balsan olache al é inće gnü presentè les zifres dl’acoliënza tl Südtirol y anunziè na strotöra de pröm aiüt söl Prener.
Le Presidënt dla Provinzia Arno Kompatscher à confrontè incö (03/11) la situaziun atuala di profugs che s’un sciampa da süa tera cun n capitul de soferënza dla storia locala dl Südtirol: L’Opziun â portè dan da 75 agn a na situaziun, olache i südtirolej ê rovà te na situaziun che vel incö por i profugs: an ê tla situaziun da mëssei chirì na destinaziun nöia, y an sperâ da rové pro aiüć da pert de d’atri. „Insciö ne podunse nos nia stlü i edli dan la situaziun atuala di profugs“, à dit Kompatscher che à sotligné, che la Junta provinziala laôra adöm cun le Comissariat dl govern y les organisaziuns volontares por chirì na soluziun. Kompatscher à inće fat, adöm cun le vësco Muser, n apel ai media, da tó pert al prozès de sensibilisaziun dla popolaziun sön chësta situaziun.
Inće por le vësco Ivo Muser él important „da ti dè usc a chi che vëgn massa gonot suraodüs y nia aldis: Al se trata de porsones che à messü s’un sciampè; ara n’un va de nosc comportamënt, de nosc impëgn por chës ëres, chi ëi, chi mituns y chës mitans che à messü s’un sciampè“, à dit Muser. Le vësco à recordè te chësc contest Papa Francësch, che à sotligné, che migranć y profugs ne é degönes figöres sön na brëia de sciah dl umanité. „Desgrazies de barches cun porsones che ne suravir nia le iade söl mer é deventades por tröc cosses da vigni dè“, insciö le vësco Muser che à inće recordè che, al ne se trata nia ma de tëma dal forest, mo che „gonot él inće indeferënza y refodanza che porta a tëma, schivades y desprijamënt.“ Por le vësco ne se tràtera nia de n invit a daidé, mo de n compit: „La solidarieté é nosta cherta d’identité sciöche cristians“, à dit Muser.
L’assessuria Martha Stocker à recordè che al é da desfarenzié danter döes situaziuns por ći che reverda l’acoliënza di profugs: da öna na pert chës porsones che röia diretamënter tl Südtirol, che se damana asil y che vëgn tutes sö tles strotöres aposta, y dal’atra pert i profugs che röia adalerch tres i iadi sön les barches tl süd dla Talia y che vëgn partis sö sön les provinzies y regiuns sön döt le teritore nazional (0,8 porcënt tl Südtirol). Por les porsones che fej domandes de asil él preodü tl Südtirol de plü strotöres y frabicać d’acoliënza, le frabicat plü gran é la ex-caserma Gorio a Balsan cun 186 posć. Implü pol gnì tut sö 28 porsones tla strotöra „Conte Forni“ y 24 tla „Casa del giovane lavoratore“, trames döes a Balsan y 60 porsones tla Ćiasa „Arnika“ a Maran. 166 posć vëgn por le momënt finanzià tres le program de pröma acoliënza temporanea da pert dl Stat, 132 é i posć finanzià dala Provinzia (por chi che fej domanda de asil diretamënter tl Südtirol). Le numer complessif é insciö de 298 posć.
L’assessuria Stocker à injuntè che por le momënt é 50 de chisc posć lëdi, inće deache n gröm dles porsones ne resta nia tl Südtirol, mo vëiga le Südtirol sciöche tapa de transiziun. Insciö él gnü tut sö ćina śëgn tl Südtirol dötadöm zirca 750 profugs (700 de chisc tres l’assegnaziun da pert dl Stat), presciapüch le 80 porcënt à indô lascè le Südtirol do na perioda cörta de sojornanza. „Chësc fenomenn porta pro a dificoltês, dantadöt por ći che reverda nosc impëgn por l’integraziun“, à dit l’assessuria.
Stocker à sotligné implü, che al é da desfarenzié danter „l’azetaziun ordinara de profugs“ y la refodada de profugs sön le Prener. Le secundo fenomenn reverda les porsones che conscidrëia la Talia sciöche na staziun de passaje. „Al é porsones che por la maiù pert ne à degun contat cun autoritês statales y che ne à nia interès da restè tla Talia o da damanè asil, mo che se möi autonomamënter“, insciö l’assessuria. Les refodades é insciö na chestiun che reverda les autoritês de competënza statales, mo sce la situaziun dles refusades söl Prener dess jì inant s’à la Provinzia acordè cun la cuestöra da istituì por l’invern n zënter de pröm aiüt tla staziun dla ferata dl Prener por socodì i bojëgns primars dles porsones. „Cun chësta staziun orunse ti pité l’ocajiun ai profugs da podëi dormì, se lavè, mangé y se fà capì tres n sorvisc de traduziun“, à dit Stocker. Le zënter dess gnì gestì dala Comunité raionala dla Alta Val dl Isarch.
rc
Galaria dales fotografies
