Atualità
Strades: program complementar cun 5 miliuns implü
13,24 miliuns de euro impede 3,24 miliuns: La Junta provinziala investësc tles strades dl Südtirol. Le secundo program complementar te chësc ann cun investimënć de cinch miliuns de euro é gnü aprovè incö (4 de novëmber) dala Junta provinziala y prevëiga revestimënć y tlandri dla strada nüs. Cun chësc finanziamënt gnaràl fat laûrs sön döt le teritore provinzial.
La Junta provinziala é piada ia chësc ann cun n program por la manutenziun dles strades de 3,24 miliuns de euro, dui programs complementars cun investimënć sura 10 miliuns de euro é gnüs laprò. „Cun le passè dl tëmp sunse rovà n pü’ te n intardiamënt por ći che reverda la manutenziun dles strades, mo i sun śëgn tl laûr da recuperè chësc intardiamënt“, à dit incö le Presidënt dla Provinzia Arno Kompatscher che à comuniché tres la conferënza stampa l’aprovaziun da pert dla Junta provinziala dl secundo program complementar che reverda le finanziamënt y le program de laûrs por la manutenziun dles strades. Por le Presidënt Kompatscher é chisc investimënć importanć por plü aspeć: „Da öna na pert se tràtera de aumentè la segurëza sön strada y i laûrs é nezesciars por miorè la mobilité, dal’atra pert él inće mosöres de prevenziun che smendrësc de majeri dagns economics y implü se tràtera chilò de de piceres ordinaziuns che porta pro a impulsc inće por l’economia locala.“
Cun l’aprovaziun di mesi finanziars da incö gnaràl realisé mosöres de manutenziun te düć i raiuns dl Südtirol che gnarà ćiamò scrites fora chësc ann. „I ùn bele podü stlü jö chësc ann na seria lungia y importanta de laûrs de manutenziun dles strades“, à dit l’assessur por le sorvisc strades Florian Mussner. Inće por merit di mesi finanziars complementars aprovà dala Junta chësc ann él stè poscibl da comedè plü dagns che é gnüs gaujà dal burt tëmp dl invern dl ann passè, i plü importanć de chisc é danter l’ater: Salten-Sciliar (strada provinziala 64 Ćiastel – Urtijëi, strada statala SS242 da Pontives a Runcadic, Jenesien-Flaas)tla Val d’Isarch (manutenziun dles strades tles localitês de Funès, Ratschings Pfitsch), Val de Puster (strada provinziala San Martin - Eores, San Ćiascian, Franzensfeste, Vahrn), Val Venosta (zirconvalaziun Laas, strada statala a Schlanders) Balsan – Bassa Val d’Adesc (strada statala danter Karneid y Deutschnofen, strada statala danter Salurn y Neumarkt), Burggrafenamt (Nals, Lana).
Por l’ann 2015 él preodü implü n aumënt dl budget d’investimënć por la manutenziun ordinara dla rëi stradala. Chësc é gnü anunzié incö dal Presidënt dla Provinzia Kompatscher: „Por l’ann 2015 gnarà le budget aumentè de 10 miliuns y sarà insciö sura 23 miliuns de euro“, à dit Kompatscher.
rc
