Atualità
Stipendiums por chi che stüdia fora dl Südtirol: Domandes ćina ai 18/12
Da incö (05 de novëmber) inant él poscibl da fà domanda por stipendiums y rembursamënć dles tasses scolastiches por l’ann scolastich 2014/15 por scolars y scolares che frecuentëia na scora alta o n curs a tëmp plëgn de formaziun profescionala fora dl Südtirol. L’ultimo dé por dè jö la domanda é ai 18 de dezëmber.
I formulars da scrì fora por dè jö la domanda por n stipendium por la frecuentaziun de scores alter o cursc formatifs a tëmp plëgn fora dl Südtirol é da ciafè tl Ofize Assistënza scolastica, strada Andreas Hofer 18 a Balsan. I formulars po inće gnì desćiarià dala Rëi Zivica sot a chësta misciun: http://www.provinzia.bz.it/la/sorvisc/sorvisc-a-z.asp?bnsvaz_svid=1015323. Les domandes por i stipendiums po gnì dades jö ćina en jöbia, ai 18 de dezëmber 2014 tl Ofize Assistënza scolastica.
I stipendiums variëia aladô dl davagn familiar dla porsona che fej domanda danter 1.500,00 euro ćina 4.000 euro. Les condiziuns por che la domanda vëgnes azetada é na dorada minima dl stüde o curs foradecà de almanco sis mëisc. A pert i stipendiums, pol inće gnì fat domanda por le rembursamënt dla tassa scolastica o dla tassa dl curs. Inće te chësc caje gnaràl tut sciöche basa de calcolaziun le davagn familiar, la soma dl rembursamënt variëia danter le 10 y le 70 porcënt dl cost dla tassa. La rembursamënt gnarà ma apliché sce la tassa é plü alta co 500,00 euro.
Domandes de contribuć por la promoziun dl stüde po gnì dades jö da zitadins comunitars y extracomunitars che é almanco da dui agn residënć tl Südtirol, y che à n davagn "depuré" anual tl 2013 de mascimo 32.000,00 euro. Implü ne po le zitadin che fej domanda nia bele s’anuzé de n ater stipendium por le studium che al fej domanda y al ne po nia s’anuzé de na comodaziun debann. Por cursc cun na tassa scolastica dër alta, sura i 10.000,00 euro, vëgn la soma totala dl davagn "depuré", cun chëra che an à le dërt da ciafè n contribut finanziar, alzada à 34.000,00 Euro.
rc
