Atualità
Jornalisć y la vera tl Oriënt Vijin: mësa torona ai 12 de novëmber
L’Ofize Chestiuns de cabinet mët a jì, adöm cun l’assoziaziun da Maran „Trait d’Union“ por düć i interessà na sëra d’informaziun sön la vera tl Oriënt Vijin cun jornalisć, scriturs y soziologs. L’incuntada é preodüda en mercui ai 12 de novëmber a Balsan tl Eurac.
„Vera tl Oriënt Vijin? Che combat pa cuntra che y porćiodì pa?“ chësc é le titul dl’incuntada publica sön le program en mercui ai 12 de novëmber dales 18.30 tl salf dles conferënzes dl’Eurac a Balsan. L’incuntada vëgn organisada dal Ofize Chestiuns de cabinet dla Provinzia en colaboraziun cun l’assoziaziun Trait d’Union da Maran. Le moderadù sarà Franz Kössler da Eppan, jornalist dl ORF y colaboradù dl Manifesto, RAI3, ANSA y de folieć todësc da Roma. Al tolarà pert ala debatüda inće Karin Kneissl, professuria de plü universitês, danter chëstes chëres de Beirut y dl Libano, che é spezialisada sön temesc dla politica energetica y dles relaziuns internazionales, Maria Gianniti, corespondënta dl „Giornale Radio RAI“ tl Oriënt Vijin y Adel Jabbar, soziologh che à studié spostamënć de migranć y relaziuns transculturales.
Tres sües conscidraziuns gnaràl pité n cheder dla situaziun y dl svilup di conflić tl Oriënt Vijin y de sciöche i media trata chëstes tematiches. N cheder dla situaziun umanitara tl Iraq gnarà inće pité da Domenico Chirico, diretur dl’organisaziun „Un ponter per…“, che laôra da prësc vint agn tles arees de conflit. Inće la Provinzia sostëgn atualmënter n proiet de cooperaziun internazionala tl nord dl Iraq che à le fin da realisé strotöres scolastiches y soziales por i jogn. Implü promöi la Provinzia inće dui proieć de assistënza sanitara tla Siria por la realisaziun de scolines y strotöres adeguades por mituns y mitans zënza geniturs tres les organisaziuns "Syrian Children Relief" y "Ai.Bi. Amici dei Bambini".
rc
