Atualità
Convëgn de comparaziun sön la proteziun iuridica dla maternité
Incö danmisdé, ai 6 de novëmber él gnü tignì tla sënta dl Assessorat por le laûr n convëgn de comparaziun sön la proteziun iuridica dla maternité y sön les mosöres de sostëgn che é preodüdes por geniturs tl Südtirol, tl Tirol y ti Grijuns.
„Les desposiziuns iuridiches por la proteziun dla maternité y les mosöres de sostëgn por i geniturs tl Südtirol, tl Tirol y ti Grijuns“: chësc é le titul dl convëgn de comparaziun dla legislaziun tl ćiamp dla proteziun iuridica dl laûr che é gnü organisé incö danmisdé (ai 6 de novëmber) tla sënta dla Repartiziun Laûr y a chël al á tut pert che inće les assessuries Martha Stocker (politiches soziales) y Waltraud Deeg (familia).
Tl Südtirol él mesanamënter zirca 600 ëres al ann che lascia so laûr por se dè jö cun la familia y jì derevers tl monn dl laûr, che ne é gonot nia saurì.
Tratan le convëgn, che é gnü organisé en colaboraziun cun l’EURES TransTirolia,él stè plü esperć dl Tirol, Südtirol y di Grijiuns che à portè dant la situaziun iuridica dla proteziun dla maternité te sües regiuns, comparan inće les legislaziuns y sü aspeć öna cun l’atra y presentan n'analisa dl reinserimënt dles ëres tl monn dl laûr do la maternité.
Le diretur dla Repartiziun Laûr y presidënt dl'Eures TransTirolia, Helmuth Sinn, à sotligné te süa relaziun les desfarenzies por ći che reverda la porcentuala de ocupaziun dles ëres do la maternité danter i stać dl’Europa dl nord en confrunt cun la Talia y i paîsc dl’Europa dl süd. Por le diretur Sinn é chëstes desfarënzies danter l’ater inće na conseguënza de n majer sostëgn tres mosöres politiches y de na majera proteziun dla maternité söl marćé dl laûr da pert di paîsc dl’Europa dl nord.
L’assessuria por le politiches soziales Martha Stocker à sotrissé l’importanza da mostrè sö les desfarënzies danter les legislaziuns de regiuns confinëntes tl ćiamp dla proteziun dla maternité, deache l’identificaziun de chëstes podess portè al fin, olache al é poscibl, da adatè mosöres de d'atres regiuns por promöie la mediaziun danter familia y laûr (por ejëmpl por ći che reverda la flessibilité di orars de laûr y le rode y i compić dl pere tla familia).
Do i intervënć dl diretur Sinn y dl’assessuria Stocker à Luce Dalla Rosa dl Ispetorat por le laûr dla Provinzia de Balsan presentè „les desposiziuns por la proteziun dla maternité tl setur publich y privat tl Südtirol“. Florian Brutter, dla Ćiamena de Comerz dl Tirol, Andi Albin y Jörg Guyan dl „Ofize por l’industria, les erts, i mistiers y le laûr“ dl ciantun di Grijiuns, à daldô portè dant la situaziun dla legislaziun sön la proteziun iuridica dla maternité te sües regiuns.
rc
