Atualità
SEL surantol les cuotes ENEL: „ N gran vare tla politica dl’energia“
„L’indipendënza dl Südtirol por ći che reverda le refornimënt dl’energia eletrica vëgn ampliada y la posiziun dla Provinzia renforzada tl setur dla politica dl’energia“, le Presidënt Kompatscher y l’assessur Theiner valutëia positivamënter l'operaziun che à portè al'acuisiziun da pert dla SE Hydropower dles cuotes dla ENEL te önesc de gragn y set de pici implanć idroeletrics.
„Cun la surantuta s’ampliëia les poscibilitês de dezijiun dl Südtirol, al crësc l’indipendënza y la sostenibilité tla produziun de energia, inće por merit dl fat che chëstes ressures strategiches importantes restarà tl dagnì completamënter tla Provinzia; ares deventarà na pert dl patrimone de döta la popolaziun. Chësc ô dì la creaziun de n valur ajunté de almano 50 miliuns de euro al’ann“, à sotligné Kompatscher che à ajunté, che chësta surantata da pert dla SE Hydropower y de n terzo da SF Energy dla cuota de 40 porcënt dla ENEL te önesc de gragn y set de pici implanć idroeletrics, é na gran prestaziun por la politica dl’energia tl Südtirol, deache insciö „sun stà bugn da renforzè sostanzialmënter les funziuns dl Südtirol tl setur energetich“, insciö Kompatscher.
Inće por l’assessur por l’energia y l’ambiënt Richard Theiner é la surantuta n vare important por le dagnì: „Cun la surantuta dles cuotes dl ENEL saràl na cuantité de eletrizité de presciapüch n miliun de megawattores che passarà anualmënter ala sozietè d’energia provinziala SEL, chël ô dì, che chësta cuantité d’eletrizité podarà gnì adorada y aministrada autonomamënter.“
L’assessur Richard Theiner à inće sotligné l’importanza dla cumpra dles cuotes ENEL por ći che reverda la tlassificaziun dl Südtirol sciöche „KlimaLand“: „Cun la cumpra dles cuotes ENEL él poscibl da renforzè la produziun d’energia te na manira sostenibla, lëdia da CO2 y plü efiziënta por anuzé la forza dl’ega südtiroleja tres le plann tlima provinzial y la strategia de planificaziun sostenibla „Energia-Südtirol-2050“."
Por ći che reverda les conseguënzes dla surantuta à sotligné le Presidënt dla Provinzia che le Südtirol é sön le dërt trù. „Cun prësc la totalité de produziun de energia che vëgn da fontanes energetiches sostenibles à nosta provinzia da śëgn inant n gröm de poscibilitês por le dagnì, inće por conservè chësta ressura importanta tla competiziun te na dorada lungia y por atué insciö les mosöres nezesciares a bëgn di zitadins y dla provinzia“.
La surantuta dles cuotes ENEL é por le Presidënt dla Provinzia inće n vare inant tl contest de n svilup dinamich dl’autonomia, „deache chëstes poscibilitês nöies nes pormët de garantì n progrès y svilup economich y sozial“, insciö Kompatscher.
rc
