Atualità
Cöi adöm fontanes por le dagnì: I cronisć dl Südtirol s'incunta
„Stories de paîsc y stories de paîsc“: Sot a chësc moto s’à incuntè incö danmisdè (ai 7 de novëmber) les cronistes y i cronisć dl Südtirol tl Zënter pastoral da Balsan. Le simposium da chësc ann é l’ediziun numer 17 dl „Dé di cronisć y dles cronistes“ a chël che al à tut pert danter l'ater la direturia dl Archif provinzial Christine Rolio y la presidënta Rita Thaler Wieser.
Le 17ejimo „Dé di cronisć y dles cronistes" é gnü organisé dal Archif provinzial en colaboraziun cun l’Ofize Biblioteches y letöra tres le forum "Bibliotheksforum Südtirol 2014" incö, vëndres ai 7 de novëmber tl Zënter pastoral da Balsan. La presidënta di cronisć Rita Thaler Wieser à rengrazié tratan le scomenciamënt dl'incuntada i presënć por so laûr prezius de volontariat y de sostëgn dl Archif provinzial.
„Les biblioteches rapresentëia formaziun, cultura, intratignimënt, informaziun, discusciun, ares é sciöche zëntri de competënza mediala, mediadësses de leteratöra y de savëi y posć olache les generaziuns s’incunta“: chëstes les parores de descriziun dla funziun dles biblioteches aldedaincö da pert dl vize-presidënt di cronisć Raimund Rechenmacher che à ajunté, che les biblioteches y i cronisć dess avëi na funziun ativa de motivaziun di zitadins da se dè jö cun le lì y l’inresce, por ejëmpl tres l’organisaziun de scomenciadies. Le fin dles incuntades y di proieć é prinzipalmënter chël da portè grups de interessà tles biblioteches, da revaluté le racoiüdes di libri por che ares vëgnes adorades deplü y da ti dè ala biblioteca plü importanza tla comunité sciöche zënter de documentaziun. N ejëmpl te chësc vers é por ejëmpl la racoiüda dles croniches anuales che vëgn archiviades tles biblioteches y po insciö gnì anuzades da düć te na manira scëmpla y direta.
Volker Klotz, diretur dl Ofize Biblioteches dla Repartiziun todëscia, à portè dant la tematica dla funziun dles bibiloteches sciöche posć de incuntades, „na sort de fistis di paîsc y punć fisc por i abitanć por s’incuntè danter les generaziuns. Ares é insciö posć importanć de comunicaziun danter y amesa na picera comunité sciöche chëra de te pici paîsc.“ Les biblioteches à insciö tut ite la funziun di fistis olache la jënt s'incuntâ laôta tl zënter di paîsc, insciö Klotz.
Por Margot Pizzini, referënta di cronisć, é la funziun prinzipala dl Archif provinzial, sciöche ënt dl’aministraziun publica, dandadöt chëra de revaluté la figöra di cronisć tres n prozès de profescionalisaziun dl laûr, da definì i compić di cronisć istituzionalmënter y da aumentè la colaboraziun cun l’Archif provinzial integran i cronisć tl’organisaziun de scomenciadies y manifestaziuns.
Le diretur dla Teßmann, Johannes Andresen, à presentè les ofertes digitales pitades dla Biblioteca provinziala, danter chëstes l’azès internet ai catalogs y por s’imprestè fora les publicaziuns, l’evoluziun dl imprestimënt de media digitai tres la plataforma Biblio24 y i vari inant ti seturs dla digitalisaziun, visualisaziun y archiviaziun de publicaziuns storiches tres le portal „Tessmann digital“. Le 17ejimo Dé di cronisć é gnü stlüt jö cun na mësa torona de discusciun.
rc
