Atualità
S’orientè damì sö por munt: Azés diret ai dać geografics por zitadins
S’orientè damì ti raiuns alpins, localisé plü saurì les üties da munt y scemplifiché les operaziuns de pröm aiüt: chëstes é n valgönes dles conseguënzes dl proiet "OpenGISData.eu" tres chël che al é gnü coiü adöm dać geografics por i mët a desposiziun ai zitadins y ales aziëndes. Les novitês tres l’azés diret é gnüdes presentades incö (10/11) dal Presidënt Kompatscher y dal’assessuria Deeg.
Le Südtirol à fat n gran vare inant por ći che reverda l azés diret ai dać geografics: tres la contlujiun dl proiet „OpenGISData.eu“, che é gnü metü da jì tl 2011 cun le finanziamënt dl Fonds europeich por svilup regional (FESR), à la Repartiziun Informatica, le TIS innovation park y le Consorzium di Comuns coiü adöm i dać geografics dl Südtirol por i mët a desposiziun ai utënć te na manira diretamënter azessibla. Les novitês tres l’azés diret di dać geografics é gnüdes presentades incö, lönesc ai 10 de novëmber dal Presidënt dla Provinzia Arno Kompatscher y dal’assessuria por l’informatica Waltraud Deeg te na conferënza stampa a Balsan. Öna de chëstes é la scemplificaziun dla programaziun tecnologica de aplicaziuns nöies por ënć publics, aziëndes y sozietes.
Le Presidënt dla Provinzia Arno Kompatscher à recordè le svilup dl proiet dal 2013 inant: „Tres le Consorzium di Comuns, de chël che i ê le Presidënt tl 2013, ânse metü a desposiziun, adöm ala Repartiziun Informatica, indöt 120.000 dać geografics tres numeri d’abitaziuns y incö poi presentè, sciöche Presidënt dla Provinzia, i resultać de chësc proiet.“
Tres la publicaziun de chisc dać él stè poscibl, danter l’ater, da otimisé la cherta geografica dl proiet "Openstreetmap", n sistem de navigaziun tl Südtirol che funzionarà tl dagnì cotan damì cun informaziuns plü avisa. Le Presidënt dla Provinzia à inće sotligné che la Junta provinziala crëi dër tl proiet Open Data: „I dać che vëgn coiüs adöm dal’aministraziun publica contëgn na cuantité d’informaziuns dër ütles che vëgn metüdes a desposiziun por düć. Cun la destribuziun de chisc dać vëgnel aumentè la trasparënza y sostignì le svilup ti ćiamps dla tecnologia y inovaziun.“ Le Presidënt dla Provinzia à confermè che chëstes mosöres ne violëia nia la privacy di zitadins dl Südtirol, „che vëgn respetada, deache düć i dać di Comuns é dać anonims.“
L’assessuria por l’informatica Waltraud Deeg à sotligné l’importanza dl prozès de digitalisaziun che reverda düć i ćiamps dla vita publica mo inće seturs de chëra privata: „Por merit dles tecnologies informatiches él poscibl por l’aministraziun publica da mioré i sorvisc por i zitadins y les aziëndes.“ Tratan la conferënza stampa él gnü presentè danter l’ater plü vantaji che l’azés diret ai dać geografics porta cun sè: un di vantaji é pro ejëmpl l’otimisaziun dla chirida di sistems de navigaziun ti raiuns da munt. Por üties da munt, restauranć y hotì ô chësc dì che ai gnarà ciafà plü saurì.
N ater vantaje dla publicaziun di dać é la reduziun de cosć ajuntifs por gaujia de n funzionamënt aproscimatif di sistems de navigaziun tl Südtirol, sciöche al desmostra inće l’ejëmpl dl Comun de Villandro, olache i autoćiars se pordô y â spo daldô dificoltês da jì derevers. „Insciö él sozedü plü gonot che i stodafüch à messü daidé autoćiars en dificolté sön strades da munt che ti é gnü segnalades mal“, à splighé incö l’ombolt da Villandro y imprenditur tl setur informatich Walter Baumgartner. „Tres l’azés diret ai dać geografics saràl tl dagnì dessigü demanco de chisc caji, deache i dać geografics dl comun é da ciafè cun plü prezijiun. Chësc portarà insciö a n'smendrimënt di cosć“, insciö Baumgartner.
Dlungia l’otimisaziun dl’orientamënt sön strada y sö por munt podarà i dać geografics inće gnì anuzà por otimisé i sorvisc tl setur dl turism: por ejëmpl tres le svilup de apps y ofertes nöies por i ghesć che vëgn en vacanza tl Südtirol. „Les informaziuns che i metun à desposiziun é la materia pröma por le svilup de apps y programs nüs, che porta pro a scemplifiché la vita di zitadins y dles aziëndes“, à splighé inultima Huber Hofer, diretur dl TIS innovation park. En ejëmpl dl’otimisaziun di sorvisc dles aziëndes é por ejëmpl la creaziun dl sorvisc de chirida online dl’aziënda dl trasport local SASA, che à metü a desposiziun debann dötes le informaziuns por ći che reverda les lignes dles corieres, i coliamënć y i orars.
rc
Galaria dales fotografies
