Atualità
Reforma dl'aministraziun publica: Le prozés dess gnì stlüt jö por le 2018
Sciöche „n‘operaziun a cör davert“ à definì incö (10/11) le Presidënt dla Provinzia Arno Kompatscher la reforma dl’aministraziun, che dess gnì stlüta jö ćina le 2018. „I messun assigurè che i sorvisc funzionëies inće tla fasa de transiziun ćina la contlujiun dla reforma“, à splighé Kompatscher. Le Presidënt ti à presentè incö ales perts soziales le prozés „Inovaziun dl’aministraziun 2018“.
I obietifs, les diretives, l’organisaziun temporala y strotorala dl proiet ti é gnüdes presentades incö, lönesc ai 10 de novëmber, dal Presidënt dla Provinzia Arno Kompatscher y dal’assessuria por l’aministraziun publica (AP) Waltraud Deeg ai rapresentanć dles categories economiches y di sindacać. Tl'incuntada de presentaziun dla reforma dl'AP él inće gnü portè dant dal Presidënt Kompatscher y dal’assessuria Deeg les rajiuns de chësta reforma. „Öna dles rajiuns prinzipales é che l’ultima reforma dl’aministraziun é gnüda fata tl 1992. Cun le passè dl tëmp é l’aministraziun publica chersciüda deache ara à tut so competënzes nöies“, à splighé Kompatscher. Por l’assessuria Deeg val debojëgn de na reforma nöia, deache les carateristiches dla sozieté s’à mudé cun le tëmp (svilup demografich, globalisaziun, mudaziun dles aspetatives di zitadins) y de conseguënza "mëss l’aministraziun publica nezesciariamënter gnì adatada a chisc cambiamënć, por che ara devëntes plü sterscia y adatabla ai bojëgns di zitadins tl dagnì," insciö Deeg.
Te chësc contest déssel gnì dandadöt stlarì cai che é i sorvisc che la Provinzia dess pité. „Ara nun va inće da capì y definì ći sorvisc che po gnì surantuć da d’atres organisaziuns zënza fins de davagn“, insciö le Presidënt. Por l’assessuria Deeg reverda n valgönes dles domandes prinzipales la despartiziun tlera di sorvisc y dles prozedöres: „I messun se damanè co che i podun laurè damì, plü saurì y te na manira plü efiziënta, ći strotöra che i adorun y orun y ći compić che i orarun surantò.“ La resposta a chëstes domandes comporta por l'assessuria Deeg dandadöt n’analisa prezisa di sorvisc pità dales strotöres dl’aministraziun publica, che dess portè a na valutaziun de co scemplifiché chëstes prozedöres complicades y otimisé la colaboraziun y la rëi danter les istituziuns.
La junta provinziala à dè dant incö, tres l'assessuria Waltraud Deeg, n valgönes indicaziuns de traverć concreć: la pröma indicaziun é la previjiun che l’organisaziun nöia funzionëies tres n catalogh dles prestaziuns, n manejamënt dl personal efiziënt y ativitês tleres de govern y control. La secunda indicaziun, secundo Deeg, prevëiga n’ejaminaziun sistematica de dötes les spëises che dess portè a n’adoranza mirada y efiziënta dles ressurses desponbiles; la terza indicaziun d’intervënt reverda la reduziun dl pëis burocratich tres na scemplificaziun di prozesc. "Inultima él important da valorisé la responsabilité y na cultura dl’aministraziun ativa", à stlüt jö l’assessuria provinziala.
Le presidënt dla Provinzia Kompatscher à sotrissé che ara se trata de n prozès lunch, che dess gnì a s’al dè por la majera pert ćina dl 2018: "Chësta reforma ne po nia gnì aplicada da incö a doman", insciö Kompatscher, che à recordè che ara ne se trata nia da sciuré demez döt chël che é gnü fat tl tëmp passè, mo “ara nen va plülere da concretisé na reforma pian ia dal’organisaziun interna dl’aministraziun.“
rc
Galaria dales fotografies
