Atualità
Dala junta: 6 films tl Südtirol, al röia adalerch Tornatore, Irons y DeSica
Al se trata de indöt 6 proieć che vëiga danfora 122 dis de registraziun tl Südtirol sostignis dala junta provinziala, che à aprovè incö (11 de novëmber) le terzo call. Cun n finanziamënt de 1,7 miliuns de euro aràn 3 miliuns de davagn por le Südtirol. Pro i proieć anunzià él inće n film de Giuseppe Tornatore cun Jeremy Irons.
La promoziun di films, manajada da BLS, à consolidé le Südtirol sciöche location por films y fictions: al é gnü cherié na niscia de laûr spezifica (costruturs de interns y de scenografies, casting, catering, y i.i.) y al vëgn garantì n davagn diret y positif sön l'economia locala: por lege, mëss na soma anfat al 150% dla soma conzedüda sciöche sovenziun gnì investida tl Südtirol. La junta à valutè incö le 3° call, chël ô dì le terzo terminn dl 2014 por la presentaziun di proieć de produziuns. Al gnarà finanzié 6 films, cun na soma complessiva de 1,75 miliuns de euro (les domandes por 20 proieć ê de passa 5,5 miliuns). "Al vëgn preodü 122 dis de registraziun tl Südtirol y n davagn sön le teritore de passa 3 miliuns de euro", à sotrissé le presidënt Arno Kompatscher.
Dui proieć é südtirolej, i atri 4 nazionai. Le film "La Corrispondenza": soget y regia dl pest Oscar talian Giuseppe Tornatore, i protagonić prinzipai é bonamënter n ater pest Oscar, Jeremy Irons, y Blake Lively. Al vëgn inće tut sö te Balsan. Sö Ritten gnaràl indere tut sö "Fräulein" cun Christian De Sica. Le soget y la rejia é de Caterina Carone, che à davagnè le concurs de scritöra organisé da BLS. Spo él inće "Bianco", na coproduziun talian-franzeja, cun Elio Germano y Luca Argentero. Le film cunta é n drama sön les Alpes y prevëiga 27 dis de registraziun a San Ćiascian y incëria.
D’atres produziuns finanziades dala Provinzia é "Von Männern und Vätern", documentar südtirolej, soget y rejia de Andreas Pichler, coproduziun ZDF, che gnarà fat a Balsan y Porsenù; "Grand Hotel", na seria TV talian-todëscia de 12 puntades danter Ćiastel Wolfsthurn, Ratschings y Glurns, y "Commissari Europei", n documentar de Gustav Hofer y Luca Ragazzi.
USP
