Atualità
Dala Junta: Normes nöies por i profescionisć tl setur dl frabiché
La Junta provinziala à aprovè incö (11 de novëmber) n ajornamënt de n regolamënt vedl de 10 agn: insciö él gnü adatè plü normes ai svilups atuai tl setur dl frabiché. Öna dles mudaziuns dl regolamënt nü é che les prestaziuns pitades da profescionisć sciöche architëć, geometri y injeniers gnarà reconosciüdes inće dal punt de odüda contratual.
Geometri, architëć, injiniers y d’atri profescionisć che laôra tl setur dl frabiché pîta na seria de prestaziuns sides tla fasa de proietaziun, sciöche inće tratan la costruziun de frabicać che vëgn realisà dala man publica: Por adeguè n regolamënt vedl de 10 agn à la Junta provinziala aprovè incö n ajornamënt dles normes ai svilups atuai tl setur dl frabiché.
Te plü caji surantol aldedaincö profescionisć lëdi che ne fej nia pert dl’aministraziun publica compić prinzipai tl setur dl frabiché, sciöche por ejëmpl la proietaziun, la direziun di laûrs de n cantier o le coordinamënt dla segurëza sön cantiers dauris dala Provinzia. La regolamentaziun dles condiziuns contratuales se basâ ćina aldedaincö sön n decret dl ann 2004, „cun le passè dl tëmp à le svilup te chësc setur portè de plü novitês cun sè dandadöt por ći che reverda le punt d’odüda tecnich y legislatif, y chësc à contribuì a mudé sostanzialmënter les prestaziuns che i profescionisć mëss pité aldedaincö“, à splighé incö le Presidënt dla Junta Arno Kompatscher do la sentada dla Junta.
N ejëmpl te chësc vers é le conzet dla ĆiasaTlima che tl 2004 gnô odü sciöche n fenomenn marginal, y che aldedaincö prevëiga l’osservanza de plü standarg de efiziënza energetica inće tres normes iuridiches provinziales, statales y europeiches. „I profescionisć dl setur é insciö oblià da pité sorvisc nüs, nia definis y nia preodüs dlungia i sorvisc de norma che ai ofrësc da plü tëmp“, à splighé Kompatscher.
Cun la delibraziun nöia aprovada incö (ai 11 de novëmber) vëgn insciö les condiziuns generales de düć i contrać cun i profescionisć tl setur dl frabiché adatades ai svilups atuai, sides dal punt de odüda iuridich che tecnich. “La formulaziun dla regolamentaziun nöia é gnüda a s’al dè en acordanza cun i rapresentanć dles categories economiches y profescionales interessades. I sun stà bugn da ciafè na soluziun cun chëra che düć é a öna. Les normes nöies stabilësc implü criters che aumentëia la trasparënza y che definiësc te na manira tlera i sorvisc y le pëis economich dles prestaziuns. Chësc porta pro a vantaji sides tratan l’evaluaziun dles ofertes che dles gares di concursc“, insciö Komaptscher.
rc
