Atualità
Trasport publich local: La Juntà adatëia les tarifes
La Junta provinziala à aprovè n adatamënt di prisc dles chertes y di abonamënć por le trasport local, zënza mudé le prinzip dl sistem tarifar dl "Südtirol-Pass": chi che anüza deplü i mesi dl trasport publich, paia demanco. I aumënć reverda dandadöt chi che anüza püch sü abonamënć, chi che i adora gonot paiarà tan co śëgn. Por scolars y seniors saràl da paiè ite na cuota anuala.
L’assessur por la mobilité Florian Mussner à presentè incö (ai 11 de novëmber) les mudaziuns dl plann tarifar nü che é gnüdes aprovades dala Junta provinziala. „Les tarifes dl trasport publich local vëgn insciö adatades ai traverć statai y europeichs che, por smendrì le pëis finanziar di cosć di trasport publich, prevëiga che almano le 35 porcënt di cosć de gestiun mëss gnì finanzià tres le sistem de trasport local instës“, à splighé l’assessur Florian Mussner che à ajunté che „tl Südtirol é chësta cuota atualmënter dl 24 porcënt.“ Atualmënter é i cosć por la ferata locala de 50 miliuns de euro al ann, por le trasport publich tres les corieres vëgnel dè fora 80 miliuns de euro al ann. “Le trasport publich vëgn insciö bele finanzié aldedaincö dai zitadins, la gran pert dl finanziamënt te na manira indireta: cun les mudaziuns al plann tarifar gnaràl tl dagnì partì sö damì i cosć sön chi che anüza efetivamënter le trasport publich”, insciö Mussner.
Inće deache la formula di abonamënć dess ester na sbürla ai zitadins por anuzé deplü le trasport publich, é i adatamënć al plann tarifar dandadöt plü relevanć por chi che anüza püch i mesi publics. La Repartiziun dla Mobilité presentëia te chësc contest valgügn dać atuai: di 80.000 che à le ABO+ n’ él 36.000 che l’anüza manco co un n iade al’edema, di 75.000 che à l’Abo65+ n’él 41.000 che adora so abonamënt manco co n iade al’edema y di 130.000 che à le Südtirol Pass n’él 66.000 che l’adora anualmënter por jì demanco co 1.000 chilometri. “Les mudaziuns y l’adatamënt di prisc é insciö inće na sbürla y na motivaziun por anuzé deplü les corieres y les ferates”, insciö Mussner.
I adatamënć dl plann tarifar prevëiga danter l’ater chëstes mudaziuns: tl dagnì ne sarà la formula di abonamënć debann nia plü ativa. “Impò sarà le trasport publich, por chisc grups che s’à anuzè ćina śëgn de abonamënć debann, dër a bun prisc,” spliga l’assessur. Insciö paiarà dal proscimo ann scolastich 2015/16 i scolars ćina la maturité y i scolars (a tëmp plëgn) dles scores profescionales por so Abo+ na cuota anuala de 20 euro. Por i seniors prevëiga les mudaziuns dl plann tarifar che i zitadins sura i 75 agn paiarà cun le scomenćiamënt dl ann 2015 20 euro al ann, i zitadins dai 70 ai 75 agn paiarà na cuota anuala de 75 euro. Tl detai él preodü che i zitadins che complësc i 70 agn tl 2015 paiarà 75 euro, tl 2016 inant paiarà 75 euro düć chi che complësc chël ann 70 agn y 71 agn y.i.i. Chi che à complì 70 agn tl 2014 paiarà indere tres ma 20 euro.
Dal 1 de setember 2015 gnaràl inće adatè les categories dles tarifes por le Südtirol Pass - tres do le prinzip: chi che anüza deplü i mesi dl trasport publich, paia demanco – y olache l’alzamënt di prisc aprovè s’arbassarà cun l’aumënt dl numer de chilometri y portarà de conseguënza a arbassamënć dl cost mesan por chilometer. Chës ô dì: por i pröms mile chilomentri saràl da paié deplü (12 cent pro chilometer, denant ot), dai mile ai duimile chilometri s’alza le prisc al chilometer da cater o ot zent. Dai 2000 chilometri inant (ćina ai 10.000) s’arbassarà le prisc al chilometer da cater o trëi zent y daldô gnaràl calcolé – sciöche atualmënter - dui zent por vigni chilometer. Dai 20.000 chilometri inant resta le iade debann.
„Por düć chi che anüza dër tröp le trasport publich ne se mudaràl inće do i adatamënć aprovà incö nia, implü resta la cuota mascimala anfat co śëgn de 640 euro“, spliga l’assessur Mussner. Por i pendolars che anüza le trasport publich por rové söl post de laûr porta les mudaziuns al plann tarifar a n aumënt mesan di cosć dl 18 porcënt (sön trates de lunghëza mesana ćina 12 chilomteri), sön trates dai 16 chilometri inant sarà i aumënć di cosć por i pendolars minims.
Adatamënć di prisc é inće gnüs aprovà por le Südtirol Pass family che costarà tl dagnì 10 zent (impede di sis atuai) por chilometer por i pröms 1000 chilometri, daldô set zent (impede trëi) ćina 2000 chilometri, y do i 2000 chilometri ćina 10.000 chilometri vëgn l’import smendrì a dui zent (impede di trëi atuai). Inće por les families ne se müda nia l’import mascimal anual de 530 euro.
Inultima él ćiamò gnü aprovè na novité che reverda düć i anuzadus dl Südtirol Pass: che che à le Südtirol Pass ne paiarà mai plü co 15 euro al dé, „chësc inće deache la Mobilcard por i ghesć costa por un n dé 15 euro y i südtirolej ne dess nia gni desvantajà en confrunt ai ghesć“, insciö Mussner che à sotligné che inće sce les tarifes dl trasport publich é gnüdes aumentades por i anuzadus, éres tres ćiamo cotan mëndres co chëres dles regiuns tles vijinanzes: tl Tirol costa por ejëmpl n abonamënt anual por i scolars 96 euro, por i zitadins sura 75 agn 120 euro.
rc
