Atualità
La Junta à aprovè le dessëgn de lege por pices dejotes y chëres mesanes
Reduziun dla burocrazia, trasparënza y adoranza sostenibla dla ressursa idrica: chisc é i obietifs prinzipai dl dessëgn de lege che ajornëia la regolamentaziun sön les conzesciuns de de pices derivaziuns y de chëres mesanes por la produziun de energia eletrica. La regolamentaziun nöia é gnüda aprovada incö (11 de novëmber) dala Junta provinziala sön proposta dl assessur Richard Theiner.
La Junta provinziala à insciö aprovè incö (11 de novëmber) n dessëgn de lege che reverda la regolamentaziun nöia por les conzesciuns por pices dejotes y chëres mesanes, che é fondamentales por le refornimënt d’energia ti raiuns rurai. Le dessëgn de lege é gnü metü adöm tres la colaboraziun danter esperć y operadus dl setur dla produziun d’energia. Sciöche pices dejotes él gnü definì chëres che à na potënza istalada de 220 kilowatt y che vëgn anuzades dantadöt por refornì de pices unitês, por ejëmpl lüsc da paur o üties da munt. Por le momënt é la soma de chisc pici implanć tl Südtirol de 784, indöt feji fora le 3,2 porcënt dla produziun de energia eletrica tl Südtirol. Les dejotes derivaziun mesana prodüj indere 806 miliuns de kiloWatt al’ora (kWh) al ann, na cuantité che fej fora presciapüch le 13 porcënt dla produziun totala dl'energia eletrica tl Südtirol. Sciöche derivaziuns mesanes él gnü definì implanć cun na potënza istalada da 220 a 3000 kW. Tl Südtirol nen él atualmënter 146.
Le dessëgn de lege aprovè dala Junta prevëiga, insciö le Presidënt dla Provinzia Kompatscher „danter l’ater n aumënt dla trasparënza y dla concorënza, la definiziun dla componënta dl interès publich, la sostenibilité y na reduziun ampla dla burocrazia: chëstes diretives gnarà aplicades aladô de regoles tleres tratan la fasa de presentaziun di proieć y tres na scemplificaziun dles prozedöres d’autorisaziun y n aumënt dles responsabilitês di conzescionars.“ Les novitês é de plü: le dessëgn dla lege prevëiga la separaziun danter de pices derivaziuns y chëres mesanes. Por les pices derivaziuns é la novité plü grana le smendrimënt dla burocrazia: do la domanda por na conzesciun gnaràl tut na dezijiun dala Conferënza di sorvisc, te chëra che al gnarà injuntè dötes les autorisaziuns nezesciares. Do l’arat positif da pert dla Conferënza à le domandatar 90 dis por desmostrè la desponibilité dl terac. Implü gnarà la conzesciun renovada automaticamënter, sce le conzescionar à l’interès da orëi l’arlunjè y sce al ne é degügn elemënć che é cuntra n arlunjamënt.
Por ći che reverda les derivaziuns mesanes gnaràl tl dagnì apliché na prozedöra nöia, „inće deache chisc implanć é fondamentai por le refornimënt de energia te zones rurales“, insciö le Presidënt Kompatscher che à ajuntè: „tl dagnì gnaràl apliché n concurs por les conzesciuns che arà sciöche un di criters de valutaziun inće le paiamënt de contribuć por le ressanamënt dl ambiënt, cun la medema formula de compensaziun ambientala che vel atualmënter por i conzescionars di gragn implanć idroeletrics, deache inće les derivaziuns mesanes prevëiga n’adoranza intensiva dl’ega.“ Por chisc implanć ne vel inultima nia l’arlunjamënt automatich, implü él preodü por derivaziuns mesanes inće la poscibilité de espropriaziuns, deache ares é de interès publich.
rc
