Atualità
Mussner incunta la Garanta por l’infanzia: segurëza sön le tru da scora
La segurëza di scolars y dles scolares sön le tru da jì vigni dé a scora é stè un di temesc prinzipai dl’incuntada danter l’assessur por la mobilité Florian Mussner y la Garanta por l’infanzia y adolescënza Paula Maria Ladstätter. Trames döes les perts à concordè sön l’importanza dla programaziun y dl’atuaziun de mosöres de proteziun y sensibilisaziun.
Öna dles prioritês dla proteziun de scolars y studënć reverda la segurëza sön le tru che porta da ćiasa a scora. La Garanta por l’infanzia y por l’adolescënza Paula Maria Ladstätter y l’assessur por la mobilité y le sorvisc strades Florian Mussner à concordè da colaborè por na maiù segurëza te chësc setur. „N dërt fondamental di mituns y di jogn é inće chël da rové zënza prighi y sigüsc da ćiasa a scora. Le respet por i dërć di mituns y di jogn se mostra inće tres le comportamënt de vignun tl trafich sön strada“, insciö l’assessur Florian Mussner che à ajunté che al é da öna na pert important da cherié passaji y marciapîsc sigüsc mo inće da rovëne cun prudënza dantadöt tles vijinanzes de scores y scolines.
Scomenciadies concretes sciöche le proiet S.O.S. Zebra y la colaboraziun cun l’assoziaziun VKE y i Comuns, à ajuntè la Garanta por l’infanzia y adolescënza Paula Maria Ladstätter „aumentëia la segurëza sön le tru da scora y motivëia da respetè i dërć di mituns y di jogn cun mosöres concretes tla vita da vigni dé.“ L’assessur Mussner é contënt dla valutaziun positiva dl proiet S.O.S. Zebra da pert dla Garanta por l’infanzia y por l’adolescënza y à confermè la orentè da colaborè inće tl dagnì cun Paula Maria Ladstätter por realisé proieć concreć che contribuësc a garantì le bëgnester di mituns y jogn.
rc
