Atualità
„Scora ladina tl dialogh“: Döes sëres de discusciun sön le svilup dla scora
„La Scora tl dialogh!“: Chësc é le moto dles döes incuntades, a chëres che l’assessur por la scora ladina Florian Mussner y l’Intendënt Roland Verra inviëia düć i rapresentanć scolastics y interessà a laurè fora propostes y idees concretes por le svilup dles scores y dles scolines dles valades ladines por le dagnì. Les incuntades é ai 20 de novëmber a San Martin y ai 21 de novëmber a Urtijëi.
Aldì les propostes y colaborè düć adöm por garantì le mantignimënt y svilupè inant la cualitè dla scora ladina inće tl dagnì: Chisc é dui di obietifs dles döes sëres de dialogh che gnarà tignides tles valades ladines por integrè dötes les perts interessades, rapresentanć dl monn dla scora y Université, di insegnanć, geniturs, scolars, jogn, studënć, dles aministraziuns comunales tla formulaziun de propostes y diretives por le svilup dla scora ladina tl dagnì. „Les propostes de düć é fondamentales por conzepì la scora adöm, chëstes döes sëres é na poscibilité de dialogh y confrunt, olache al gnarà inće baié danter l’ater dla colaboraziun cun les families, dla continuité y dl svilup dla formaziun por la mendranza ladina y dla colaboraziun danter les istituziuns scolastiches. Dötes les propostes concretes é begnodüdes por colaboré te na manira critica y costrutiva al svilup de nosta scora“, spliga l’assessur por la scora ladina Florian Mussner.
Valgönes dles domandes a cherës che an ti jarà do sarà: Cares é pa les sfidades y ći competënzes unse pa debojëgn por le dagnì? Ci svilup ôl pa ester ti proscimi 10 agn por le sistem formatif dla mendranza ladina? Cai sarà pa i proscimi vari da fà? L’educaziun di mituns y dles mitans sarà al zënter dl dialogh, sciöche inće les aspetatives y ghiranzes di geniturs y insegnanć.
Les döes sëres de discusciun danter i rapresentanć di insegnanć, geniturs, scolars, jogn, studënć, dles aministraziuns comunales cun i direturs y suranstanć dla scora ladina porta le titul „La scora ladina tl dialogh! Sëra de discusciun sön tematiches dl momënt y dl dagnì dla scolina y dla scora ladina“. La pröma incuntada vëgn tignida
en jöbia, ai 20 de novëmber 2014
dales 19:30
tl salf dl Istitut Ladin „Micura de Rü“
a San Martin de Tor
la secunda sëra de discusciun é preodüda por
en vëndres, ai 21 de novëmber 2014
dales 19:30
tla Ćiasa de Cultura „Luis Trenker“
a Urtijëi.
Düć i interessà y i rapresentanć di media é dër bel invià a to pert ales sëres de discusciun.
rc
