Atualità
I jogn dles Consultes provinziales s'incunta cun esperć dl abité
I rapresentanć dles Consultes provinziales di jogn di trëi grups linguistics s’à incuntè cun l’assessur provinzial por le frabiché abitatif Christian Tommasini y cun i esperć dla Repartiziun frabiché abitatif y dl Istitut por le frabiché sozial por tratè plü propostes por na cultura nöia dl abité.
Sön na cultura nöia dl abité che valorisëia deplü la dimenjiun soziala è debatü dan da püch les Consultes provinziales di jogn di trëi grups linguistics adöm ai trëi assessurs por la cultura Florian Mussner, Christian Tommasini y Philipp Achammer, tl contest dla reuniun anuala che é gnüda tignida chësc ann tl Zënter por i jogn „Nëus Jëuni Gherdëina“ a Urtijëi ala fin d’otober. I jogn s’aôda na cultura nöia dl abité sura la tradiziun dla cultura dles proprietês privates fora y che tëgnes cunt de modì cun plü flessibilité por ći che reverda i afić. Al é inće gnü baiè dla sostenibilité y dl co-housing, chël ô di de comunitês de vijinanza olache les sperses coletives gniss organisades tres na gestiun de comunanza che portass inće a sparagns economics y conseguënzes positives por la natöra ecologica y soziala.
L’assessur Tommasini à orü sotligné tratan la sentada da inier a Balsan che sce da öna na pert esistel tl Südtirol modì nüs por la cumpra de abitaziuns sciöche por ejëmpl le model „Bausparen“, él dal atra pert debojëgn da definì propostes por l’afit nöies che tol en conscidraziun les esigënzes di jogn. Sön la basa dles idees portades dant a Urtijëi à l’assessur Tommasini fat la proposta da sperimentè modì nüs dl abité tres i ejëmpli dl co-housing y dl co-working. L’idea é chëra da realisé n proiet daldöt nü che podess gnì adatè daldô tla Provinzia y che vëgn bel adorè sciöche model dl abité te plü Stać tl nord dl’Europa. La formula dl co-housing prevëiga la creaziun de abitaziuns nöies che porta pro a sparagns economics y a vantaji soziai y ecologics tres na manira de gestiun coletiva di afitadins. N atre vantaje podess ince ester la creaziun de sperses por ofizi y sëntes de laûr da se partì sö danter plü profescionisć jogn che ne à nia la poscibilité da afitè locai por süa ativité profescionala. Chëstes formes de gestiun coletiva podess inće portè ala creaziun de cooperatives danter profescionisć y insciö a nöies oportunitês de laûr.
Le pröm vare, insciö à splighé l’assessur Tommasini, sarà n’analisa tres l’Istitut por le frabiché sozial IPES dla poscibilité de realisaziun dl conzet de co-housing, inće por ći che reverda les desfarënzies danter les citês y i paîsc dla Provinzia, olache an tolarà en conscidraziun inće les minunghes da pert dles aministraziuns comunales. Les incuntades danter l’assessur Tommasini y les Consultes provinziales di jogn jarà inant ti proscimi mëisc, do la renovaziun dl mandat dles Consultes che toma tosc.
rc
