Atualità
Colaboraziun Provinzia-Diozeja: Le vësco Muser s’incunta cun la Junta
Na delegaziun cun ghesć d’onur ti à fat vijita incö (18/11) ala Junta provinziala: por le pröm iade à le vësco Ivo Muser vijité, adöm a plü rapresentanć dla Diozeja Balsan-Porsenù, la Junta provinziala. L'ocajiun é gnüda anuzada por tratè danter l'ater plü tematiches che reverda la scora, la solidarieté, la sconanza di bëgns culturai y l’istituziun dla festa de Sant Ojöp siöche dé de festa.
„L’incuntada danter na delegaziun dla Diozeja Balsan – Porsenù y la Junta provinziala é stada na poscibilité importanta de aprofondimënt sön valgügn temesc olache al é bele gnü a se le dè na colaboraziun strënta danter les istituziuns dla Provinzia, dla Diozeja cun les organisaziuns che alda laprò“, à splighé incö, mertesc ai 18 de novëmber le Presidënt dla Provinzia Arno Kompatscher tratan la conferënza stampa do la sentada dla Junta, a chëra che al à inće tut pert le vësco Muser. „L’incuntada é stada plajora – à ajuntè le Vësco Muser - inće deache i un albü la poscibilité da tratè plü tematiches che reverda – inće sce cun prospetives y competënzes desfarëntes – sides la dlijia che la provinzia y olache na colaboraziun porta pro a vantaji por döta la popolaziun südtiroleja.“
Por le presidënt Kompatscher y le vësco Muser é le renforzamënt de n tlima de solidarieté tla sozieté n obietif prinzipal de trames döes les organisaziuns. „Öna dles componëntes prinzipales por le funzionamënt de na sozieté é la solidarieté danter les porsones y al intern dla comunité südtiroleja“, insciö le Presidënt Kompatscher. Le vësco Muser à sotligné te chësc vers la funziun de sostëgn importanta dles families por renforzé la solidarieté tla comunité.
Tla sentada danter i rapresentanć dla diozeja y dla junta provinziala él gnü analisé implü le sostëgn publich ales scores privates. „I ne orun degun tratamënt privilegé, deache nosta orentè é ma chëra da orëi dè n contribut por le svilup dla sozieté che pëia ia da nosta interpretaziun cristiana dla vita“, à splighé le Vësco Muser. „Cun les dificoltês de bilanz él tler che al ne sarà nia poscibl da aumentè le sostëgn finanziar, insciö unse ciafè n’acordanza da laurè fora n plann plurienal por ti dè plü segurëza y stabilité ai bilanć de previjiun dles scores“, à dit Kompatscher. Na previjiun sura plü agn ne foss insciö nia ma de aiüt por les scores, mo inće por les calcolaziuns dles spëises por i proscimi agn dla Provinzia, insciö Kompatscher.
N ater setur olache la diozeja colaborëia cun la provinzia reverda la sconanza di bëgns culturai. „Trames döes les perts é a öna che la colaboraziun te chësc setur funzionëia dër bun y che ara dess gnì mantignida inant“, à comentè le Presidënt Kompatscher. Inultima él incö ćiamò gnü portè dant n dejider da pert di rapresentanć dla diozeja: insciö dess la festa de Sant Ojöp, che toma ite ai 19 de merz, gnì detlarada dé de festa, al tomass demez sciöche dé de festa le lönesc de Pasca de Mà. La rajiun de chësta proposta é gnüda spligada dal vësco Muser:„Ai 19 de merz vëgnel festejé Sant Ojöp, che é inće le patrun dl Tirol.“ Dal punt de odüda legisatif é la dezijiun da istituì dis de festa na competënza che ti speta al Consëi provinzial. La Junta à detlarè l’intenziun da ti menè inant la proposta al Consëi.
rc
Galaria dales fotografies
Foto USP/mb
