Atualità
Dala Junta: Fujiun SEL-AEW,svilup turistich y microstrotöres por l’infanzia
La Junta provinziala à tratè incö (18/11) te süa sentada edemala plü tematiches che reverda i seturs dla produziun d’energia, dl turism y dl’assistënza por la pröma infanzia. Insciö él gnü aprové critês nüs por i contribuć ales microstrotöres d’assistënza por l’infanzia, cater conzeć por le svilup turistich (cun piceres mudaziuns) y al é gnü tratè la chestiun dla fujiun danter SEL y AEW.
Plü posć a desposiziun por i mituns y manco burocrazia: Chësc l’obietif di critês nüs por i contribuć por les microstrotöres d’assistënza por la pröma infanzia (tres i conzeć de cooperatives y de umes dl dé) che é gnüs aprovà incö, mertesc ai 18 de novëmber, dala Junta provinziala sön proposta dl’assessuria Waltraud Deeg. „Tl Südtirol él na rëi de 50 microstrotöres de assistënza por la pröma infanzia partides sö danter 35 comuns, implü röiel laprò 7 microstrotöres aziendales y al é inće n aumënt dl sorvisc dles umes dl dé. Cun la regolamentaziun nöia aprovada incö saràl poscibl por les aziëndes, canche ai orarà ti pité a sü colaboradus n’assistënza por i mituns, da s’anuzé dles ofertes de posć tles microstrotöres por la pröma infanzia y dles umes dl dé. I criters nüs vel inće por chi che laôra tl setur publich", à splighé l’assessuria por la familia Waltraud Deeg. La poscibilité de auto-detlaraziuns y la scemplificaziun dla contabilité porta para inće n smendrimënt dla burocrazia, insciö Deeg.
Danter l’ater à La Junta provinziala tratè incö inće i proscimi vari che reverda la renunzia dla provinzia ala maioranza dles cuotes tla sozieté de produziun d’energia nöia che dess nasce tres la fujiun danter SEL y AEW. „Te chësta sozieté unica ne oress la provinzia ne avëi nia plü la maioranza dles cuotes che gniss partides sö danter düć i comuns dl Südtirol por integrè deplü i comuns tla produziun y destribuziun dla energia eletrica“, insciö Kompatscher. Por ći che reverda la concretisaziun de chësta venüda à la Junta provinziala tut incö la dezijiun da ti dé l’inćiaria al assessur Richard Theiner da aprofondì plü aspeć cun i Comuns, danter l’ater por ći che reverda la calcolaziun de parameters y la partezipaziun efetiva de vigni comun. „Nosta intenziun é chëra da orëi garantì na spartiziun danter i comuns aladô dles proporziuns y definida te na manira tlera tres criters ogetifs“, à splighé Kompatscher. L’oferta de partezipaziun y de surantuta dles cuotes ti gnarà pitada a düć i comuns y nia ma a chi che fej bele sëgn pert dles sozietês. "Por ći che reverda i implanć idroeletrics de derivaziun mesana (cun na potënza istalada de 3 megawatt)à la Provinzia bele tut la dezijiun da mët a desposiziun di comuns interessà sües cuotes de partezipaziun tles sozietês“, à splighé le Presidënt Kompatscher.
Implü à la Junta provinziala ejaminé y dè jö so arat positif (cun de pices mudaziuns ales zifres complessives) ai cater conzeć de svilup turistich di Comuns de Vizze, de San Martin (Passeier), de Parcines y de Laiun. I cater conzeć de svilup turistich prevëiga n aumënt complessif de 1650 posć de pernotamënt y de 250 posć por le camping. „Conzeć por le svilup dl turism é na mosöra che i comuns po adorè por aumentè süa oferta tl setur turistich y che vëgn daimpröma valutada da na comisciun aposta por gnì aprovada daldô te Junta. Öna na mosöra é por ejëmpl l’aumënt di posć de pernotamënt, che vëgn ma conzedüda sce l’anuzamënt dl’oferta atuala é buna y sce al nen é debojëgn, n’atra mosöra po inće ester n aumënt cualitatif dl’oferta pitada“, à splighé le Presidënt dla Provinzia incö.
rc
