Atualità
Assistënza por l’infanzia: Prësc trëi miliuns por les "umes dl dé"
Prësc trëi miliuns de euro mët la Junta provinziala a desposiziun por l’ann 2014 por le finanziamënt dl sorvisc dles umes dl dé. Sön proposta dl’assessuria Waltraud Deeg é la terza pert dl finanziamënt de 1,218 miliuns de euro gnüda aprovada inier (18/11). Les organisaziuns che organisëia le sorvisc d’assistënza po fà domanda por l’antizipaziun dl 85 porcënt dl finanziamënt complessif.
Le sorvisc dles umes dl dé (Tagesmutter) s’à svilupé inant ti ultimi trëi agn y é aldedaincö n model important por l’assistënza di mituns do la nasciüda (dai trëi mëisc inant) ćina ai trëi agn. Tl 2013 él gnü registré indöt 442.000 ores d’assistënza, n aumënt dl 14 porcënt en confrunt al 2012. Tl 2013 à les umes dl dé ćiarè de indöt 1106 mituns, 114 implü co tl ann denant. Le numer dles umes dl dé che pîta le sorvisc ativamënter é aumentè da 162 a 178.
„Le sorvisc dles umes dl dé é n’oferta dër flessibla che po gnì adatada ai bojëgns de trames döes les perts - sotlignëia l’assessuria Waltraud Deeg – y l’aministraziun publica po por mirit de chësc sorvisc ampliè l'oferta d’assistënza por l’infanzia inće tles zones rurales.“
Cinch cooperatives se crüzia dl’organisaziun dl sorvisc y surantol l’assiguraziun y la formaziun suplementara dles umes dl dé. Les cooperatives é inćiariades da dè inant informaziuns ai geniturs sön le sorvisc, da mëte en contat i geniturs cun les umes dl dé y da controlè che i standarg dles abitaziuns (por ći che reverda segurëza, grandëza y igiena) vëgnes respetà. Implü organisëieres la suravijiun dl sorvisc y tëgn le contat cun atres istituziuns partner.
L’ativité dles cinch cooperatives vëgn sostignüda economicamënter dala provinzia che à inserì le finanziamënt dles umes dl dé tla lege por les families sciöche un di pilastri dl’assistënza por la pröma infanzia. „Le finanziamënt é gnü mudé chësc ann, - insciö l’assessuria Deeg - insciö él gnü aumenté le contribut a na soma mascimala dl 85 porcënt dles spëises reconesciüdes. Les cooperaziuns po inće inserì, por le pröm iade, le paiamënt ales umes dl dé sciöche spëises.“ Cun l’assegnaziun de trëi antizipaziuns bele damperfora (ćina śëgn nen gnôl conzedü öna) déssel inće gnì smendrì i problems de licuidité, insciö Deeg.
„Por le finanziamënt dl sorvisc dles umes dl dé – spliga inant l’assessuria Deeg - mët la Junta provinziala chësc ann a desposiziun indöt prësc trëi miliuns de euro.“ Do l’aprovaziun dles prömes döes perts da 1,736 miliuns de euro él gnü aprovè inier la terza pert da 1,218 miliuns de euro. Les cinch cooperaziuns podarà fà domanda por n’antizipaziun dl 85 porcënt dla soma totala che ti speta, le 15 porcënt che resta gnarà paié fora do la presentaziun dl bilanz de contlujiun. Les cinch cooperaziuns soziales che organisëia le sorvisc dles umes dl dé à inom: "Sozialgenossenschaft Tagesmütter", "Mit Bäuerinnen lernen-wachsen-leben", "Primi passi - Tagesmutter", "Casa Bimbo" y "Coccinella".
rc
