Atualità
Dé cuntra la violënza sön les ëres: plü segurëza tres n'app por mitans
En gaujiun di 25 de novëmber, dé internazional cuntra la violënza sön les ëres, él gnü presentè incö, lönesc ai 24 de novëmber n „app por les mitans“, realisada dala Comisciun por l’avalianza dles oportunitês dles ëres y dl Sorvisc Ëra. L’assessuria Martha Stocker dij: „L’app é n contribut important por informè les mitans y les ëres jones sön les sorts desvalies de violënza cuntra d‘ëres."
Por gaujia dl aumënt dla violënza sön les ëres y en gaujiun dl dé internazional cuntra la violënza sön les ëres indoman ai 25 de novëmber, à la Comisciun provinziala por l’avalianza dles oportunitês dles ëres y le Sorvisc Ëra presentè incö n’app nöia interativa por mitans cun consëis por la segurëza. La app é ponsada dantadöt por mitans y ëres jones y ara pîta na varieté de funziuns te situaziuns te chëres che ares podess se sintì tl prigo, malsigüdes y manaciades. Implü él gnü integrè tl‘app inće funziuns de aorela cörta por alisiré l’azès y l’anuzamënt por les mitans y les ëres.
L’assessuria provinziala por l’avalianza dles oportunitês Martha Stocker à sotligné che „al é fondamental da informè les mitans y les ëres sön i prighi y les formes de violënza poscibles sön les ëres. La app é insciö na metoda inovativa y moderna por arjunje dantadöt les generaziuns nöies che s’anüza de smartphones.“ La presidënta dla Comisciun provinziala por l’avalianza dles oportunitês, Ulrike Oberhammer, é contënta che al é stè poscibl da stlü jö chësc proiet che va inant da dui agn: „L’„app por les mitans“ é online y po gnì desćiariada debann. Ara dà consëis y mostra sö les formes desvalies de violënza cuntra les ëres. L’app é insciö n stromënt important d’informaziun por imparè da conësce les poscibilitês y les metodes de defenüda cuntra la violënza. Sce al ess da sozede caji de violënza val dagnora debojëgn da damanè aiüt. La app à inće na funziun cun n botun „SOS“ cun chëra che an po fà pié ia dal fonin n segnal d’alarm acustich y cun löms che avisëia l’atenziun dles porsones tles vijinanzes sön le pericul. Implü ti pol inće gnì menè inant n messaje d’aiüt ales forzes dl ordinn y de pröm aiüt tres la funziun de pröm aiüt. Tl medemo momënt vëgnel inće registré la posiziun dl fonin y insciö inće chëra olache l’aiüt va debojëgn.“ Implü él da ciafè tles funziuns dl’app inće funziuns de aurela cörta, por ejëmp tres na racoiüda de ćianties che tematisëia la violënza sön les ëres tres le proiet „Music stops the violence“.
La vizepresidënta dla Comisciun provinziala por l’avalianza dles oportunitês, Fran Toffol, à dit che ara oress anuzé l’ocajiun de presentaziun dl’app nöia „por sotligné l’importanza de dötes les aziuns de prevenziun che vëgn metüdes da jì por smendrì la violënza sön les ëres, che mëss gnì combatüda inće a livel cultural y educatif, tres n’educaziun al respet tles relaziuns danter i ëi y les ëres, sides tl publich, che tl privat.“
Les funziuns dla app tl detai:
Funziun SOS
Sce al vëgn druché sön le botun SOS spo pëiel ia plü iadi dal fonin le messaje vocal „Al fuoco, al fuoco!!!“ (Al verd, al verd!), adöm a na segnalaziun acustica y de löms che dëida y dà plü segurëza te situaziuns de pericul. Al po inće gnì ativé la funziun de SOS cun chëra che ara va da ti menè n messaje d’aiüt y d’intervënt ai Carabinieri, ala Polizia, ai Stödafüch y al Pröm Aiüt.
Consëis
Tla app vëgnel inće mostrè sö plü grafiches interatives cun consëis sön co se comportè te situaziuns desvalies de violënza sön les ëres.
Ćianties
Tres n audio-player él poscibl da ascutè plü ćianties. Al se trata de ćianties cuntra la violënza scrites y ćiantades da grups musicai jogn tres le proiet „Music stops the violence“ che la Comiscun provinziala por l’avalianza dles oportunites por les ëres y le Sorvisc Ëres à metü da jì en gaujiun dl Dé internazional cuntra la violënza sön les ëres tl 2010. Grups musicai à insciö albü la poscibilité da realisé sües ćianties cun tesć de sensibilisaziun sön la violënza sön les ëres. Les ćianties é spo gnüdes tutes sö profescionalmënter te n studio musical y presentades al publich cun n conzert a Bornech tl 2010.
Selfies
L’app pîta inće la poscibilité da se fà n selfie cun le fonin, olache al po gnì injuntè le slogan „Una donna di valore“. Chësta funziun dess aumentè l’autostima y la segurëza te se instësses. La foto po gnì postada tres i social media sön facebook y inće menada inant tres SMS.
Infopoint
Tres chësta funziun él poscibl da consulté na cherta geografica che mostra sö le misciuns plü importantes olache an po ciafè informaziuns (numeri de telefonn, contać internet, misciuns).
Informaziuns d’ütl
La app pîta implü inće informaziuns d’ütl, por ejëmpl informaziuns sön le sorvisc dles corieres Nithliner y n glossar cun spligaziuns detaiades.
La app é desponibla debann tles botëghes virtuales dl’app store y te google play. Informaziuns plü avisa pon ciafè tres la plata internet: www.provincia.bz.it/pariopportunita/app.asp. Scomenciadies por le dé internazional dla violënza cuntra les ëres é da ciafè tres la plata internet www.provincia.bz.it/pariopportunita/25-novembre-2014.asp y sön Facebook https://www.facebook.com/chancengleichheit.pariopportunita
rc
Galaria dales fotografies
da man ciampa: l'assessuria Martha Stocker, Vera Nicolussi-Leck, Ulrike Oberhammer, Franca Toffol, Helga Innerhofer y Julia Psenner
