Atualità
20 agn Zentrala di Consumadus: „Ara s’à davagné la crëta di zitadins“
En gaujun di 20 agn dala fondaziun dla Zentrala Consumadus dl Südtirol él gnü metü da jì incö (24 de novëmber) danmisdé a Balsan n convëgn. Chësta manifestaziun ne é insciö nia ma stada n’ocajiun por festejé n iubileum, a sotligné le Presidënt Kompatscher, mo „por festejé na storia de suzès: la Zentrala di Consumadus é aldedaincö zënza concorënza por ći che reverda la crëta che i consumadus ti à.“
Dan da 20 agn, plü avisa ai 4 de messè dl 1994, à la Zentrala di Consumadus dl Südtirol metü man süa ativité a Balsan, y cun le passè dl tëmp s’àra etablè y é deventada la usc prinzipala di consumadus tl Südtirol. Süa ativité ti ultims agn é insciö gnüda presentada incö en gaujiun dla festa di 20 agn tres n convëgn al’Eurac, a chël che al à inće tut pert le Presidënt dla Provinzia Arno Kompatscher y l’assessuria Waltraud Deeg. Le crëta tla Zentrala di Consumadus é inće gnüda a se le dè – insciö le Presidënt Kompatscher - por mirit de süa organisaziun orizontala, che é partida sö tres n model de partners soziai te döt le Südtirol: „Bele tl mëteman él stè tler che la sconanza di consumadus ne é nia na forza che sbürla cuntra l’economia, mo che laôra inće te so interès.“ N’atra rajun por le suzès dla Zentrala di Consumadus é, aladô de Kompatscher, le svilup dl’organisaziun che é „chersciüda tl Südtirol da lajö sö.“
Por le Presidënt é i consumadus gonot te na posiziun plü debla sön le marćé: „Avisa por chësta rajun él fondamental da se lascè informè dai esperć dla Zentrala di Consumadus, che ti mostra sö al consumadù düć sü dërć y co che al é poscibl da i fà avarëi“, insciö Kompatscher, che à recordè la funziun fondamentala dla Zentrala di Consumadus sotlignan che „aldedaincö ne éra nia plü da ponsè demez da nosta sozieté.“
Le Presidënt Komaptscher à dit implü che „la Zentrala di Consumadus é tres stada independënta da d’atres istituziuns y che da pert dla Junta provinziala ne él mai gnü porvè da influenzè le laûr dl’organisaziun diretamënter,mo ara sostëgn ma la Zentrala che pîta sorvisc a bëgn dla sozieté tres le finanziamënt dles ativitês da pert dla Provinzia y che ti ultimi 20 agn é stè de indöt 6,5 miliuns de euro,“ à dit Kompatscher che à stlüt jö cun la noela che por le 2015 él preodü n aumënt di mesi finanziars che gnarà metüs a desposiziun, „mo nia porvia dl iubileum, mo deache i savun tan importanta che süa funziun é por la sozieté."
rc
Galaria dales fotografies
Foto USP/mb
