Atualità
L’ass.ria Deeg: „Aumentè la cosciënza y le coraje zivil cuntra la violënza"
L’assessuria por la familia Waltraud Deeg se damana en ocajiun dl Dé internazional cuntra la violënza sön les ëres na „maiù cosciënza sön chësc fenomenn y da mostrè plü coraje zivil.“
„Les conseguënzes dla violënza te familia sön les ëres ne é nia ma n gran pëis por les porsones che les subësc diretamënter, mo al é gonot inće i mituns che se porta do les mersces por döta süa vita“, sotlignëia l’assessuria Waltraud Deeg incö, ai 25 de novëmber, en ocajiun dl Dé internazional cuntra la violënza sön les ëres. L’assessuria se damana plü coraje zivil da denunzié ać de violënza che massa gonot romagn ascognüs al intern di mürs dles abitaziuns: „Na gran pert dla violënza vëgn praticada al’intern dles ćiases te n contest familiar y avisa por chësta rajun ne vëgnara nia denunziada. Al é insciö de bojëgn da ćiarè plü avisa, da intergnì plü debota y da denunziè atira situaziuns de violënza.“
L’assessuria Waltraud Deeg ti fej inće n apel ales forzes dl ordinn da ejaminè dër avisa y da respogn te na manira asvelta a denunziazius de caji de violënza: „Te situaziuns de violënza aspeta les ëres sovënz dër dî, denant che ares se damana aiüt. Canche ares se damana socurs él important da inrescì la situaziun atira.“ L’assessuria recorda en chësta ocajiun dl Dé internazional cuntra la violënza sön les ëres inće le laûr prezius dles Ćiases por ëres che à na funziun de aiüt y consultaziun fondamentala tla sozieté: „Chësc dé é inće n oportunité por rengrazié düć chi che laôra dé por dé por daidé ëres da nen gnì fora da situaziuns violënza.“ Plü informaziuns sön le sorvisc Ćiases por ëres pon ciafè tres l'Ofize por la Sconanza di mëndri y l'intlujiun soziala (telefonn 0471 41 82 35) o tlican chilò.rc
