Atualità
Dala Junta: Integraziun, medejina sportiva, aparać de pröm aiüt
De plü é stades les dezijiuns tutes incö, mertesc ai 25 de novëmber, dala Junta provinziala. Danter chëstes él la nominaziun dla Consulta provinziala por l’integraziun, l’istituziun de n register de doturs spezialisà che po scrì fora zertificać por pratiché sport de competiziun y la cumpra de aparać de pröm aiüt (defibriladus).
La Junta provinziala à nominé incö, mertesc ai 25 de novëmber, i mëmbri dla Consulta provinziala por l’integraziun che resta tl’inćiaria ćina la tomada de chësta legislatöra. Ara é metüda adöm da rapresentanć dles aministraziuns, dla sozieté zivila y da migranć, a će dla Consulta él l’assessur competënt por l’integraziun, Philipp Achammer. Indöt fêjel pert dla Consulta 18 mëmbri, danter chisc porsones migrantes da plü paîsc dl monn y inće rapresentanć dl Ofize Frabiché abitatif, dla Repartiziun Sanité y Politiches soziales, dla Repartiziun Laûr y dla Repartiziun Familia. „La funziun de chësc ënt é chëra da ti presentè propostes ala Junta provinziala por le svilup dles normes ti seturs dla migraziun y dl’integraziun, da studié plü avisa le program plurianual dl’integraziun y da dè jö arać sön dezijiuns che reverda la migraziun y l’integraziun“, à splighé incö le Presidënt dla Provinzia Arno Kompatscher tratan la conferënza stampa do la sentada dla Junta. La funziun dla Consulta é fondamentala por ći che reverda le coordinamënt dles ativitês de plü istituziuns y organisaziuns y che chëstes istituziuns vëgn integrades tla regolamentaziun dles normes che reverda l’integraziun y la migraziun. Implü dëidera renforzè la rëi danter i sorvisc, les istituziuns y i ënć che se crüzia dl’integraziun. L’obietif prinzipal é chël da acompagné le prozès d’integraziun cun aiüć y propostes che scemplifichëia le stüde di lingac, dla storia, dl sistem iuridich tl Südtirol y dl svilup tl contest dles regoles dla sozieté. Les propostes sön i mëmbri che fej pert dla Consulta vëgn dala Provinzia, dal Consorz di Comuns, dai sindacać, dai daturs de laûr, dales consultes y organisaziuns de migranć y dales organisaziuns che laôra tl setur dl’integraziun.
La Junta provinziala à aprovè incö implü l’istituziun de n register cun doturs spezialisà de medejina sportiva che podarà scrì fora zertificać d’idoneité por la pratica dl sport de competiziun. Düć chi che ô fà sport de competiziun à debojëgn de n zertificat d’idoneité. „Insciö saràl inće i doturs spezialisà che po surandè zertificać d’idoneité che gnô ćina śëgn ma scrić fora dal Sorvisc publich dla medejina sportiva“, à splighé incö le Presidënt Kompatscher che à ajuntè che insciö "saràl inće i doturs spezialisà che podarà vijité atleć che adôra chësta zertificaziun cun la conseguënza che le tëmp de aspeta por vijites mediches sportives por mituns y atleć gnarà smendrì“, insciö Kompatscher.
La Junta provinziala à inće tut la dezijiun che la cumpra de aparać de pröm aiüt (defibriladus) gnarà organisada en colaboraziun cun le Consorz di Comuns, por mëte a desposiziun i aparać tles sëntes publiches y ti implanć sportifs. „La Provinzia metarà insciö a desposiziun i mesi finanziars por la cumpra di aparać de pröm aiüt por i implanć sportifs, a na manira che les uniuns dl sport ne ais nia bria da contribuì ales spëises“, insciö Kompatscher che à sotligné che chësta é n’investiziun importanta che po salvè la vita.
rc
